«اكادەميكتەر ءادىل سايلانۋى كەرەك» - مەملەكەت باسشىسى

بۇل جايلى قاسىم-جومارت توقاەۆ ۇلتتىق عىلىم اكادەمياسىنىڭ 75 جىلدىعىنا ارنالعان سالتاناتتى سەسسيادا ايتتى دەپ حابارلادى turkystan.kz.

«ۇلتتىق عىلىم اكادەمياسى قازىر عىلىم تۋرالى ۇلتتىق بايانداما ازىرلەۋمەن عانا شەكتەلىپ وتىر. سونداي-اق، سالالىق جۋرنالدار شىعارادى. بار بولعانى – وسى»، – دەدى مەملەكەت باسشىسى.

پرەزيدەنتىڭ ايتۋىنشا، شىن مانىندە اكادەميانىڭ الەۋەتى جانە مۇمكىندىگى الدەقايدا زور.

«بۇگىنگى احۋالىنا قاراپ، اكادەميانىڭ بولاشاعى ب ۇلىڭعىر دەپ سانايتىندار، وكىنىشكە قاراي، از ەمەس. ءتىپتى، اكادەميكتەردىڭ وزدەرى دە وعان كۇمانمەن قارايدى. الەمدىك تاجىريبەگە كوز سالساق، مۇنداي قۇرىلىمدار ەكى ءتۇرلى ۇلگىدە بولادى. ولارعا مەملەكەتتىك مارتەبە بەرىلەدى نەمەسە تاۋەلسىز كوممەرتسيالىق ەمەس ۇيىم رەتىندە جۇمىس جۇرگىزەدى. ءبىز ءتۇرلى جاعدايعا بايلانىستى ءبىر كەزدە وزگەشە جولدى تاڭداۋعا ءماجبۇر بولدىق. ۇلتتىق عىلىم اكادەمياسى كوپتەگەن قوعامدىق ۇيىمنىڭ قاتارىنا قوسىلىپ كەتتى. سالدارى قانداي بولعانىن قازىر كورىپ وتىرمىز. دەگەنمەن، ونىڭ كادرلىق جانە ينستيتۋتتىق الەۋەتى ءالى دە جوعارى»، – دەدى پرەزيدەنت.

سونداي-اق ول اكادەميكتەر بارىنشا اشىق ءارى ءادىل سايلانۋى قاجەت ەكەنىنە توقتالدى.

«جۇرت ۇيىمعا مۇشە بولۋ راسىمدەرىن جانە وعان ۇمىتكەرلەردى تولىعىمەن ءبىلىپ وتىرۋعا ءتيىس. عىلىمي قىزمەتپەن تىكەلەي اينالىساتىن اكادەميكتەرگە ءومىر بويى اي سايىن ستيپەنديا بەرۋ ماسەلەسى شەشىلەدى. مۇنىڭ ءبارى اكادەميانىڭ جۇمىسىنا تىڭ سەرپىن بەرىپ، بەدەلىن ارتتىرادى. سونداي-اق، ەلىمىزدەگى عىلىم سالاسىنىڭ تۇراقتى دامۋىنا جول اشادى»، – دەدى قاسىم-جومارت توقاەۆ.

 

ۇقساس جاڭالىقتار

Back to top button