سەمەيدە ەر ازامات ورتتەن 2 ادامنىڭ ءومىرىن ساقتاپ قالدى

سەمەي قالاسىندا بولعان ءتىلسىز جاۋدان ەكى ادامنىڭ ءومىرىن جامباەۆ داۋرەن ەسىمدى ازامات قۇتقارىپ قالدى. بۇل تۋرالى قوعام بەلسەندىسى بۋراحان داحانوۆ Facebook-تەگى پاراقشاسىندا جاريالادى دەپ حابارلادى turkystan.kz.

«كەشە چەمپيوندار ليگاسىن كورىپ وتىرعانبىز، اياق استى كورشى ماڭايدان ءورت شىققانىن كورىپ بىردەن دالاعا شىقتىم. سويتسەم، ءۇيدىڭ جانىنداعى «بانزاي» كافەسى جانىپ جاتىر ەكەن. جۇگىرىپ بارىپ ىشىندە ادام جوق پا دەپ كىرسەم، ءبىر جاس جىگىت ەسىنەن تانىپ قۇلاپ قالىپتى. ونى دالاعا الىپ شىعىپ، العاشقى كومەك كورسەتتىم. ول ەسىن جيعان بەتتە ىشىندە تاعى ادام بارىن ايتتى، بىراق ءورتتىڭ اۋقىمى كەڭەيىپ بارادى، جالىن بەت قاراتار ەمەس، تەرەزە جاقتان ءبىر شتوردى جىرتىپ الىپ ىشىنە كىرىپ كەتتىم، الگى ادام ەسىكتى ىشتەن جاۋىپ الىپتى. ءوزىم ەسىمنەن تانىپ قالا جازداپ، سىرتقا شىعىپ، عيماراتتى اينالىپ تەرەزەگە كىرپىش لاقتىرىپ شاقتىم، ەكىنشى ادام ەسىن بىردەن جيعانداي بولدى، وعان كومەك كورسەتىپ سىرتقا الىپ شىقتىم. ارى قاراي ءورت سوندىرۋشىلەر كەلىپ ءوز جۇمىستارىن اتقاردى»، – دەيدى داۋرەن.

داۋرەننىڭ ايتۋىنشا، ول ءورت ءسوندىرۋ قىزمەتكەرلەرىن كۇتپەي، ادام ءومىرىن ساقتاپ قالۋعا تىرىسقان.

«مەن ەڭ ءبىرىنشى كەزەكتە ءورت ءسوندىرۋ قىزمەتكەرلەرىن وقيعا ورنىنا شاقىرۋ ءۇشىن، ولارعا بىردەن حابارلاستىم. الايدا، ولار كەلگەنشە كۇتىپ تۇرماي، ىشىندە ادام جوق پا ەكەن دەپ قاتتى الاڭدادىم. مەندە ەشقانداي قورقىنىش بولمادى. ەڭ باستى ميسسيام، ىشىندە ادام بولعان جاعدايدا، سولاردى امان الىپ شىعۋ بولدى. باستىسى، ولار امان-ەسەن. مەن سول ءۇشىن قۋانىشتىمىن»، — دەيدى ول.

ايتا كەتسەك، داۋرەن جامباەۆ بۇگىندە 5 بالا تاربيەلىپ وتىر. ول سەمەي قالاسى نازارباەۆ زياتكەرلىك مەكتەبى ديرەكتورىنىڭ قارجى-شارۋاشىلىق ءىسى جونىندەگى ورىنباسارى قىزمەتىن اتقارادى.

ۇقساس جاڭالىقتار

Back to top button