Елордада баланы ажалдан аман алып қалған азамат марапатталды

Елордада 8-қабаттағы терезеден салбырап, құлап қала жаздаған баланы құтқарған Сәбит Шонтақбаев «Төтенше жағдайдағы ерлігі үшін» төсбелгісімен марапатталды деп хабарлады turkystan.kz ТЖМ баспасөз қызметіне сілтеме жасап.

«ТЖ бірінші вице-министрі, генерал-лейтенант Күлшімбаев Ибрагим батыр азамат Сәбит Шонтақбаевты «Төтенше жағдайдағы ерлігі үшін» төсбелгісімен марапаттады. Ол елордада баланы терезеден құлаудан құтқарды» деп жазылған хабарламада.

Еске сала кетсек, 11 мамыр күні сағат 10:21-де «Ұлы Дала көшесі, 27/1» мекенжайындағы үйдің 8-қабатындағы терезеде баланың ілініп тұрғаны туралы хабарлама келіп түскен. Шақырту орнына жеке құрамнан 7 адам және 2 бірлік техникадан тұратын Нұр-Сұлтан қаласының ТЖД бөлімшелері жедел жіберілген. Құтқарушылар оқиға орнына келген кезде сегізінші қабаттағы терезеден салбырап тұрған баланы ер адам құтқарғаны анықталды.

«Құрметті ата-аналар, бұл бала аман-есен құтқарылған сәтті оқиға, бірақ нәтижесі қайғылы фактілер де бар. Балаларды қараусыз қалдырмаңыздар! Егер үйде кішкентай бала болса, терезені ашық қалдырмаңыздар!» деп түйінделген ТЖМ хабарламасында.

Ұқсас жаңалықтар

Back to top button