جاستار دەپۋتاتتارعا ءبىلىم، جۇمىسسىزدىق، باسپانا ماسەلەسىن جەتكىزدى

ءماجىلىس دەپۋتاتتارى، «Nur Otan» پارتياسى فراكتسياسىنىڭ مۇشەلەرى ەرمان مۇحتار تىلدابەك ۇلى، وسپانوۆ بەرىك سەرىك ۇلى، قاراتاەۆ فاحريددين ءابدىنابي ۇلى، بەكجانوۆ بەرىك ايداربەك ۇلى شىمكەنت قالاسىنىڭ جاستارىمەن كەزدەستى.

جالپى، شىمكەنت قالاسىندا 14-35 جاس ارالىعىندا 365،9 مىڭنان استام جاس تۇرادى. ياعني حالىقتىڭ جالپى سانىنان 35%-دى قۇراپ وتىر. 7 جوو-دا 76 مىڭنان استام جانە 37 تەحنيكالىق جانە كاسىپتىك ءبىلىم بەرۋ مەكەمەلەرىندە 37 مىڭنان استام جاستار وقيدى. قالادا 4 جاستار رەسۋرستىق ورتالىعى، 173 جاستار ۇيىمى، «Jas Otan» جاستار قاناتىنىڭ 12 بولىمشەسى جۇمىس ىستەيدى. «Nur Otan» پارتياسىنىڭ 35 جاسقا دەيىنگى مۇشەلەرىنىڭ سانى قازىر 8،3 مىڭ (قالاداعى پارتيا مۇشەلەرىنىڭ جالپى سانىنان 23،8%) جاسقا جەتتى.

ءماجىلىس دەپۋتاتتارى مەملەكەت باسشىسى قاسىم-جومارت توقاەۆتىڭ جاستارعا بايلانىستى بەرگەن ناقتى تاپسىرمالارىن تالقىلاۋ ماقساتىندا قالا جاستارىمەن، ونىڭ ىشىندە NEET ساناتىنداعى جاستار، جاس سپورتشىلار، جاس كاسىپكەرلەر، شالعاي ەلدى مەكەندەردەگى جاستارمەن جۇزدەسىپ، ماڭىزدى تاقىرىپتار قوزعالدى.

ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقاەۆ: «جاڭا قازاقستاندى قۇرۋ ءۇشىن تۇسىنىكتى ءارى ءادىل مەملەكەتتىك ساياسات جۇرگىزىلۋى كەرەك»، – دەدى. سونداي-اق پرەزيدەنت ەلىمىزدەگى جاستاردىڭ شىنايى مۇمكىندىكتەرى تۋرالى اششى شىندىقتى ايتتى. ناقتىراق ايتساق، قاسىم-جومارت كەمەل ۇلى ءوز سوزىندە: «وكىنىشكە قاراي، جاستار ماڭدايتەرىن توگىپ، جۇمىس ىستەگىسى كەلمەيدى. ويتكەنى ولار بىزدە ادال ەڭبەك لايىقتى باعالانبايدى دەپ ويلايدى. جاستار باستىقتار مەن اۋقاتتىلارعا جاقىن جۇرەتىن ءتۇرلى الاياقتاردىڭ، جەمقورلاردىڭ شالقىپ ءومىر ءسۇرىپ جاتقانىن كورىپ وتىر»، – دەپ ەلدەگى تابىسقا جەتۋدىڭ توتە جولى وسى دەگەن قاتە تۇسىنىكتىڭ بار ەكەنىن ناقتى كورسەتتى.

كەزدەسۋدە جاستاردىڭ ءبىلىمى مەن بىلىكتىلىگىن جەتىلدىرۋ، جۇمىسسىزدىق، جاڭا ەكونوميكاعا قاجەتتى كادر تاپشىلىعىن شەشۋ، باسپانا سەكىلدى وزەكتى پروبلەمالاردى جويۋدا بىرلەسىپ جۇمىس اتقارۋ ماڭىزدىلىعى ايتىلدى. جاستار دەپۋتاتتارعا كوكەيلەرىندە جۇرگەن ءتۇرلى سۇراقتارتاردى قويا وتىرىپ، وزدەرىنىڭ ۇسىنىس-تىلەكتەرىن دە جەتكىزدى.

مەملەكەتتىك جاستار ساياساتى – قوعامنىڭ ستراتەگيالىق رەسۋرستارى دامۋىنىڭ ماڭىزدى باعىتتارىنىڭ ءبىرى. پارتيا قۇرىلعان ساتتەن-اق جانىندا جاستار قاناتىن قۇرۋ تۋرالى شەشىم قابىلداپ، ءاردايىم جاستاردى قولداپ كەلەدى. قانشاما اۋقىمدى شارالار ىسكە اسىرىلىپ، ناقتى جوبالار ورىندالدى. الداعى ۋاقىتتا كەمشىلىكتەرمەن كۇرەسىپ، جاڭا قازاقستاندى قۇرۋ جولىندا جاستارمەن بىرلەسە وتىرىپ، جۇمىستاردى جالعاستىراتىن بولادى.

ۇقساس جاڭالىقتار

Back to top button