ۆاينەرلەر جارنامالاعان پيراميدا ءىسى بويىنشا تاعى ايىپتالۋشىلار ۇستالدى

الماتىدا قارجى پيراميداسى بويىنشا تاعى ەكى ايىپتالۋشى قاماۋعا الىندى، دەپ جازدى turkystan.kz Polisia.kz-كە سىلتەمە جاساپ.

«بۇل كومپانيانىڭ نەگىزىن قالاۋشى 1988 جىلى تۋعان ج. ەسىمدى ازامات جانە باسقارما توراعاسى قىزمەتىن اتقارعان 1983 جىلى دۇنيەگە كەلگەن ر. ەسىمدى ازامات. ولار قر قىلمىستىق ءىس جۇرگىزۋ كودەكسىنىڭ 128-بابى بويىنشا ۇستالدى جانە الماتى قالالىق پد ۋاقىتشا ۇستاۋ يزولياتورىنا قامالدى»، – دەدى قالالىق پد باستىعىنىڭ ورىنباسارى رۇستەم ءابدىراحمانوۆ.

ەسكە سالايىق، بىلتىر ءبىر توپ ازامات «ASTEX.KZ» جانە «ACD Technology» جاۋاپكەرشىلىگى شەكتەۋلى سەرىكتەستىكتەرىنىڭ باسشىلارىنا قارجىلىق پيراميدا قۇرۋ جانە باسقارۋ دەرەگى بويىنشا ۇجىمدىق ارىز جازعان بولاتىن.

«2019 جىلدىڭ اقپانىنان 2021 جىلدىڭ قاڭتارىنا دەيىنگى ارالىقتا اتالعان سەرىكتەستىكتەردىڭ لاۋازىمدى تۇلعالارى جەكە جانە زاڭدى تۇلعالارمەن مەملەكەتتىك ساتىپ الۋعا قاتىسۋ ءۇشىن قاجەت دەپ بولجاناتىن قاراجاتتى تارتۋ بويىنشا بىرلەسكەن قىزمەت تۋرالى كەلىسىمدەر جاساسقانى انىقتالدى.  ەكىجاقتى قۇجاتقا سايكەس فيرمالار ءاربىر سالىمشىعا سالىنعان سالىم سوماسىنىڭ 20 پايىزىن اي سايىن تولەۋگە مىندەتتى بولعان. ASTEX.KZ جشس-نە 162 سالىمشىنىڭ 2 ميلليارد تەڭگەدەن استام قاراجاتى «MUDARABAN CAPITAL» جشس ارقىلى ءتۇسىپ وتىرعان. وسى قىلمىستى جاساعانى ءۇشىن بارلىعى سەگىز كۇدىكتى اشكەرەلەندى. ولاردىڭ التاۋى سوتتىڭ سانكتسياسىمەن قاماۋعا الىندى. قازىر بىرەۋى ىزدەۋدە بولسا، تاعى بىرەۋى ۇيقاماقتا»، – دەدى رۇستەم ءابدىراحمانوۆ.

ۇقساس جاڭالىقتار

Back to top button