Жаңалықтар

«Мені ешкім аттап өте алмайды»: Жанқош Тұраров сот орындаушысымен арадағы жанжалға пікір білдірді

Алматыдағы жеке сот орындаушылар палатасы боксшы Жанкош Тұраров пен соққы жеген сот орындаушысы арасындағы әңгіменің аудиожазбасын Tengrinews.kz сайтына берді. Спортшы Vesti.kz басылымына берген сұхбатында осы аудиожазбаға түсініктеме берді.

Аудиожазбада екі ер адам әңгімелеседі. Диалогта Жанқош Тұраровтың дауысына ұқсас адам былай дейді:

«Алеке, бұл не? Мен тұрған кезде ешкім ештеңе істей алмайды. Мені ешкім аттап өте алмайды? Тағы не жасағыңыз келеді? Қазір мұндай бассыздыққа бассыздықпен жауап беріледі. Менің әпкем тұратын үйді қалай бұзады? Ешкім орнынан қозғалмайды. Кімде-кім қозғауға тырысса, әрі қарай көреміз. Жауап береді. Бұл не әңгіме, Алеке? Бұлай болмайды. Егер сіз осы жолмен жүрсеңіз, бұқаралық ақпарат құралдарымен бірлесіп, мен де  ұйымдастырамын».

Жанқош Тұраровтың айтуынша, жазбадағы дауыс – оның дауысы. Боксшы «ер адамдардың арасында әңгіме» болғанын айтты.

«Мен жігітпін, бәріміз нағыз жігіт сияқты өстік. Жеке сот орындаушысына күш көрсеткен жоқпын. Кәдімгі ер адамдардың арасындағы әңгіме болды. Олар диктофонға жазып жатқанын ескерткен де жоқ. Бұл заң аясында қаншалықты дұрыс екенін білмеймін. Менің ойымша, ол соққы жегесін, жеке тұлға ретінде ренжіді. Ол да біреудің ағасы, біреу де одан үлгі алады. Мұның бәрі оның абыройына әсер етті. Енді ол өзін видеоға түсіріп, біреуді отырғызып, соттатамын деп қорқытады», – деді спортшы.

Жанқош Тұраровтың айтуынша, оқиға орнында ол туыстарының өтінішімен барған, бірақ жанжалға араласпаған.

«Мен туыстарыма қолдау көрсеттім. Жақын туысы қиын жағдайға тап болса, кез келген адам көмекке келеді. Мен келгенде, у-шу болып жатты. Тоқтатуды талап еттім, бірақ одан әрі жанжал болған жоқ. Куәгерлердің айтуынша, жеке сот орындаушысы да кәсіби тұрғыдан өзін дұрыс ұстамаған, дөрекі әрекет еткен. Сондықтан оның кәсіби құзыреттілігіне күмәнім бар», – деді боксшы.

Еске салайық, оқиға 4 қазанда Алматыдағы тұрғын үй маңындағы құрылыс бұзылған кезде болған. Ер адам сот орындаушысының қабырға тұсынан екі рет ұрған. Сот орындаушылар палатасы полицейлердің көзінше қызметкерді ұрып-соққанын хабарлады.

Back to top button