Ауруханадан шығып, жоғалып кеткен әйелдің денесі орманнан табылды

Ақмола облысында ауруханадан шыққан әйелдің денесі орман алқабынан табылды, – деп жазды ҚазАқпарат.

Ақмола облыстық Полиция департаментінің мәліметінше, биылғы жылдың 6 қыркүйегінде Аршалы аудандық полиция бөліміне Ақкөл қаласының тұрғыны 31 жастағы әйелден 60 жастағы қайын енесін іздеуге көмек көрсету туралы өтініш түсті.

Әйелдің айтуынша, енесі 6 қыркүйек күні сағат 14:00 шамасында Аршалы аудандық ауруханасынан шығып, белгісіз бағытта кетіп қалған.

«Бұл факті сотқа дейінгі тергеудің бірыңғай тізілімінде тіркелді. Сотқа дейінгі тергеу барысында жоғалған әйелдің келіні мен оның ұлынан жауап алынды. Ол анасының Шортанды ауданының Жолымбет ауылында інісімен бірге тұратынын түсіндірді. Биылғы жылдың 18 тамызында ол ауырып, Аршалы аудандық ауруханасына жіберілді. Әйел комаға түсті. Осы жылдың 25 тамызында өзіне келген әйел туыстарымен байланысқа шығып, олармен телефон арқылы сөйлесті. Ал, биылғы жылдың 3-ші қыркүйегінен бастап әйелдің ұялы телефоны өшірілген», – деп түсіндірді облыстық полиция департаментінің баспасөз хатшысы Гүлнар Пинчук.

Полиция департаментінің баспасөз хатшысы атап өткендей, 6-қыркүйекте әйел ауруханадан шығарылуы керек еді. Алайда, Аршалы кентіне келген туыстары оны ауруханадан таппады. 60 жастағы әйел өзін алып кетуге ұлы келді деп, ауруханадан шығып кеткен. Бастапқыда жоғалған адамның туыстары оны өз бетінше іздеп табуға тырысты, одан нәтиже болмаған соң полицияға жүгінген.

«Жедел-іздестіру шаралары барысында полиция қызметкерлері Аршалы кенті бойынша орналасқан бейнебақылау камераларының жазбаларын қарады, «Аршалы-Нұр-Сұлтан» қатынасымен тасымалдауды жүзеге асыратын такси жүргізушілерінен жауап алынды, адамдар көп жиналатын орындарда бағдарлар жапсырылды, Аршалы ауданының полиция бөлімінің қызметкерлері жоғалған адамды іздеуге жұмылдырылды, 6505 әскери бөлімінің атқыштар ротасы күштерін тарта отырып, Ақбұлақ, Ижевское ауылдары және Аршалы стансасы елді мекендері аумағын сүзіп шықты. Қыркүйектің 9-да вокзал маңындағы орман алқабынан жоғалған әйелдің денесі табылды. Осыған байланысты сараптама тағайындалды», – деп толықтырды Гүлнар Пинчук.

Айта кетсек, бұл туралы Бақытбек Қадыр есімді желі қолданушы Facebook-тегі парақшасында жазған болатын. Онда ол ауруханадан шығып, орман ішінен денесі табылған әйелдің 1961 жылғы Асқар Қазиман екенін айтады. Оны іздеуге балалары мен туыстары, полиция қызметкерлері және 30-ға жуық еріктілер тартылып, үш күн бойы іздестірген.

Back to top button