جاڭالىقتار

«ۇزدىك پەداگوگ»: اۋىل مۇعالىمى 800 مىڭ تەڭگە سىياقى الدى

اقمولا وبلىسىندا «ۇزدىك پەداگوگ» بايقاۋىنىڭ جەڭىمپازى 800 مىڭ تەڭگەنىڭ سىياقىسىنا يە بولدى.

وبلىستىق ءبىلىم باسقارماسىنىڭ مالىمەتىنشە، پەداگوگ كاسىبىنىڭ مارتەبەسىن ارتتىرۋ جانە كاسىبي قىزمەتتە جوعارى جەتىستىكتەرى بار شىعارماشىل پەداگوگتەرگە سىياقى بەرۋ ماقساتىندا اقمولا وبلىسىنىڭ باستاۋىش، نەگىزگى جانە جالپى ورتا ءبىلىم بەرۋ ۇيىمدارىنىڭ پەداگوگ قىزمەتكەرلەرى اراسىندا «ۇزدىك پەداگوگ» سىرتتاي بايقاۋىنىڭ وبلىستىق كەزەڭى وتكىزىلدى.

شىعارماشىلىق سايىسقا باستاۋىش، نەگىزگى جانە جالپى ورتا ءبىلىم بەرۋ ۇيىمدارىنىڭ 21 پەداگوگى قاتىستى. بايقاۋعا قاتىسۋ ءۇشىن پەداگوگتەر كەلەسى كونكۋرستىق ماتەريالداردى ۇسىندى: «مەنىڭ جۇرەگىمدەگى مەكتەپ» بەينەروليك، بەينەساباق، ەسسە، پورتفوليو.

بايقاۋ قورىتىندىسى بويىنشا باستاۋىش، نەگىزگى جانە جالپى ورتا ءبىلىم بەرۋ ۇيىمدارىنىڭ پەداگوگ قىزمەتكەرلەرى اراسىندا «ۇزدىك پەداگوگ» اتاعى جانە 875 100 تەڭگە اقشالاي سىياقى جاقسى اۋىلىنداعى №1 جالپى ورتا مەكتەپتىڭ قازاق ءتىلى مەن ادەبيەتى ءپانىنىڭ مۇعالىمى ءلاززات قاسقاەۆاعا بەرىلدى.

«مۇنداي بايقاۋعا العاش رەت قاتىسىپ وتىرمىن. الدىمەن اۋداندىق دەڭگەيدە گران-پري جەڭىپ الدىم. مەنىڭ جۇمىسىم وبلىسقا جىبەرىلدى. ارينە، جەڭىس مەن ءۇشىن توسىنسىي بولدى! ويتكەنى، مەن اۋداندىق مەكتەپتى تانىستىردىم جانە بايقاۋعا وبلىستىڭ بارلىق مەكتەپتەرى، سونىڭ ىشىندە قالالىق مەكتەپتەر قاتىساتىنىن ءتۇسىندىم. قۋانىشىمدى سوزبەن ايتىپ جەتكىزۋ مۇمكىن ەمەس!» – دەدى جەڭىمپاز.

جاقسى اۋىلىنداعى №1 جالپى ءبىلىم بەرەتىن مەكتەپتە ءلاززات قاسقاەۆا 2002 جىلدان بەرى 19 جىلداي ەڭبەك ەتىپ كەلەدى. ءدال سول كەزدە ول جۇبايىمەن بىرگە سولتۇستىك وڭىرگە الماتىدان كوشىپ كەلگەن. قازىر مەكتەپتە ول قازاق تىلىنەن ساباق بەرىپ قانا قويماي، تاربيە ءىسى جونىندەگى مەڭگەرۋشى بولىپ جۇمىس ىستەيدى.

سونىمەن بىرگە، بايقاۋدا 20 قاتىسۋشى اقمولا وبلىسى ءبىلىم باسقارماسى باسشىسىنىڭ گراموتالارىمەن ماراپاتتالدى.

Back to top button