ҚР Тәуелсіздігінің 30 жылдығы қарсаңында 11-15 қаңтар аралығында онлайн форматта «Uly Dala Jastary» атты III республикалық жас хореографтар байқауы өтті. Жыл сайын дәстүрлі түрде өткізілетін конкурс Т.Жүргенов атындағы Қазақ ұлттық өнер академиясына шығармашылық емтихансыз қабылдануға мүмкіндік береді.
Сайысты өнер академиясының «Хореография» факультеті ұйымдастырды.
«Биыл ҚР Тәуелсіздігінің 30 жылдығы. Осыған орай, дәстүрлі «Uly Dala Jastary» байқауын үшінші рет өткіздік. Пандемия жағдайына байланысты игі үрдісті тоқтатып қойғымыз келмеді. Карантиндік шектеулерді сақтай отырып, онлайн форматында өткізуді құп көрдік, үлкен тәжірибе болды. Талантты жасқа серпін беретін бұл бастаманың негізгі қолдаушысы болған академия ректоры Ақан Жылқышыбайұлына алғысымызды жеткізгім келеді. Экранның ар жағынан барын салып, бойындағы дарынын көрсетуге тырысып баққан қатысушылардың өнеріне шынайы тәнті болдық» – дейді Хореография факультетінің деканы Дмитрий Сушков.
Конкурсқа қатысушылардың барлық жұмысы жоғары білікті қазылар құрамымен қаралып, бағаланған. Қазақстанның еңбек сіңірген қайраткері, Қазақ ұлттық хореография академиясының профессоры А.Т.Алишева қазылар алқасының төрағасы болса, қазылар алқасының мүшелері өнер ошағына айналған Жүргенов академиясының белді ұстаздар қауымынан құралған.
Бұл өнер бәйгесіне Қазақстанның түкпір-түкпірінен үміткерлер қатысқан. Байқаудың ерекшелігі – жеңімпаздар (1 дәрежелі лауреаттар) мәдениет саласында жүрген талай тарланның тұсауын кескен Т.Жүргенов атындағы ҚазҰӨА-на шығармашылық емтихансыз қабылдану мүмкіндігін иемденді.
Байқау нәтижелері төмендегідей:
«Хореография педагогикасы» дайындық бейіні бойынша:
- 1 орын – Бейбітова Аяжан Қуатқызы (Абай атындағы Жамбыл гуманитарлық колледжі);
- 2 орын – Уахитова Гүлнұр Еркінқызы (Тәттімбет атындағы Қарағанды өнер колледжі).
- 1 орын – Дүзелбек Нұрдана Ермекбайқызы (Тәттімбет атындағы Қарағанды өнер колледжі);
- 2 орын – Тұрысбекова Сая Ерікбекқызы (М.Төлебаев атындағы музыкалық училищенің түлегі);
- 3 орын – Ғұмар Диана Маратовна (Тәттімбет атындағы Қарағанды өнер колледжі).
- 1 орын – Жаксылыкова Аида Мауленовна (А. В. Селезнев атындағы Алматы хореографиялық училищесінің түлегі).
