272
Жобаның әлі де жалғаса беруін тілеймін
Жобаның әлі де жалғаса беруін тілеймін
– Құрметті Дүниежүзі қазақтар қауымдастығы, «Отандастар қоры» және халықаралық Túrkіstan апталығы! Сіздермен өзара тығыз байланыс орната алғанымызға өте қуаныштымыз.
2020 жылы Беларусь қазақ диаспорасы сіздердің өткізіп жатқан барлық онлайн іс-шараларға белсенді қатысып, шетелдегі отандастар мен қандастарға арналған жобаларыңызды тұрақты оқып тұрамыз. «Әбу Насыр әл-Фарабидің 1150 жылдығы» тақырыбындағы эссе, Абайдың 175 жылдығына арналған челлендж, ұлттық аспаптарды үйрену, ана тілін оқыту сабақтары, сурет салу байқауы және тағы басқа іс-шараларыңызға алғысымыз шексіз. Сонымен қатар халықаралық Túrkіstan апталығы Atajurt айдарының қандастарға арналған материалдар мен шетелде жүріп табысқа жеткен қазақтар жайлы сұхбаттарды қызыға оқимыз. Бізге сондай оқуға жеңіл, ұғынықты. Бұл жобаның әлі де жалғаса беруін тілеймін.
Пандемия өзіндік түзетулер енгізгеніне қарамастан жастарға арналған Қазақстанға сапарларымыз, форумдарымыз, кездесулеріміз өз жалғасын табады деп сенемін. Келешекте мәдени, гуманитарлық және зияткерлік жобалар бойынша одан ары тиімді ынтымақтастықты жалғастырамыз деп үміттемін.
Өз атымнан сіздерден қазақтың әдет-ғұрыптары мен салт-дәстүрлерін, тарихи айдарларды зерттеуге арналған білім беру жобаларын енгізулеріңізді сұраймын. Ұлттық тағамдарды дайындау әдістерін үйрету сабағы болса қандастарымыз арасында өз тыңдармандарын табады деп ойлаймын.
Ұжымыңыздың осындай қызықты жобаларды жемісті жүзеге асыра беруіне тілектеспін.
Эльвира ЫСҚАҚОВА,
кәсіпкер (Беларусь, Минск қаласы)
