حالىقارالىق جىر ءمۇشايراسىنىڭ جەڭىمپازدارى انىقتالدى

ەگەمەندى ەلىمىزدىڭ ەڭ باستى مەرەكەسى – تاۋەلسىزدىك مەرەكەسىنە وراي قازاق پوەزياسىنا ۇلكەن قۇبىلىس جاساعان اقىن، ساعىنىشتىڭ بويتۇمارىنا اينالعان شايىر-جىراۋ، جاركەن بودەش ۇلىنىڭ شىعارماشىلىعىنا ارنالعان «ساركوبەلەك ساعىنىش» اتتى حالىقارالىق جىر ءمۇشايراسى ءوز مارەسىنە جەتتى.

حالىقارالىق «الاش» ادەبي سىيلىعىنىڭ يەگەرى، بەلگىلى اقىن جاركەن بودەش ۇلىنىڭ شىعارماشىلىعىن ناسيحاتتاۋ جانە ونەرگە قۇشتار، ورەسى بيىك جاستارعا قولداۋ كورسەتۋ ماقساتىندا ۇلت رۋحانياتىنا جاناشىر كاسىپكەرلەردىڭ قولداۋىمەن، دۇنيەجۇزى قازاقتارىنىڭ قاۋىمداستىعى جانە «وتانداستار قورى» كەاق، «Alash-CUP» قايىرىمدىلىق قورى بىرلەسىپ ۇيىمداستىردى.

اتالعان جىر دوداسىنا نۇر-سۇلتان، الماتى، شىمكەنت قالالارىمەن قاتار ەلىمىزدىڭ بارلىق وبلىستارىنان جانە الىس-جاقىن شەت ەلدەردەگى قانداستارىمىزدىڭ اراسىنان «ولەڭگە تالاسى بار» 40 جاسقا دەيىنگى قىرىققا جۋىق جاس اقىن قاتىستى.

ولەڭ ولكەسىنە وزىندىك ورنەگىمەن كەلگەن ونەرلى جاستاردىڭ ءتول تۋىندىلارىن ساراپتاپ-سارالاۋعا، ادىلەتتى باعالاۋعا ەلىمىزدىڭ كورنەكتى اقىندارى رەسپۋبليكالىق «ءتورتىنشى بيلىك» باسىلىمىنىڭ باس رەداكتورى تولەمىرزا تەمىربەك ۇلى، ءال-فارابي اتىنداعى قازاق ۇلتىق ۋنيۆەرسيتەتىنىڭ وقىتۋشىسى مۇرات شايماران، قازاقستان جازۋشىلار وداعى توراعاسىنىڭ ءبىرىنشى ورىنباسارى اقبەرەن ەلگەزەك، قازاقستان جازۋشىلار وداعى نۇر-سۇلتان قالالىق فيليالىنىڭ توراعاسى داۋلەتكەرەي كاپ ۇلى، رەسپۋبليكالىق «انا ءتىلى» گازەتىنىڭ باس رەداكتورى جاناربەك ءاشىمجان جانە دۇنيەجۇزى قازاقتارى قاۋىمداستىعى مەن «وتانداستار قورىنىڭ» وكىلى سەرىك ءابدۋالى سىندى تانىمال تۇلعالار قاتىسىپ، قازىلىق جاسادى.

قازىلار القاسىنىڭ شەشىمىمەن باس جۇلدە قىتايداعى قانداستار اراسىنان جاسىنداي جارقىراپ شىققان بەلگىلى ايتىسكەر اقىن ەرجانات بايقاباي ۇلىنا بەرىلدى. ءبىرىنشى ورىن تالانتتى اقىن ادىلەت احمەت ۇلىنا (الماتى)، ەكىنشى ورىندى تولەگەن مەللات ۇلى  (الماتى)، ريزابەك نۇسىپبەك ۇلى (نۇر-سۇلتان) ەنشىلەدى. ال، ءۇشىنشى ورىندى ورازباي جەڭىس ۇلى (موڭعوليا)، ناۋرىزباي جاربوسىن ۇلى (وزبەكستان)، كوكبورى مۇباراك (الماتى) ەسىمدى اقىندار قانجىعاسىنا بايلادى.

سونداي-اق، جىر دوداسىندا الامانعا اتويلاپ ات قوسقان مارلەن عيلىمحان (بقو، ورال قالاسى)، مۇقاعالي سەيىتقازى (قاراعاندى)، ءدىلدا ۋاليبەكوۆا (نۇر-سۇلتان قالاسى، Túrkistan گازەتىنىڭ ءتىلشىسى)، دۇيسەنالى الىماقىن (الماتى)، ۇمىتبەك باعدات ۇلى (تۇركىستان)، قۇندىز تاسقىنبەك (شقو) قاتارلى تالابى تاۋداي اقىندارعا ارنايى جۇلدە تاعايىندالدى. جەڭىمپازداردىڭ بارلىعىنا ۇيىمداستىرۋشىلار تاراپىنان العىسحاتپەن قوسا اقشالاي جۇلدە تابىستالادى.

ءمۇشايرادا وزا شاۋىپ، ولجا سالعان جەڭىمپازداردى الداعى ۋاقىتتا اقىن جاركەن بودەش ۇلىنىڭ قاتىسۋىمەن وتەتىن «ساركوبەلەك ساعىنىش» اتتى قورىتىندى شىعارماشىلىق كەشتە سالتاناتتى تۇردە ماراپاتتاۋ ءراسىمى جوسپارلانىپ وتىر. ارقالى اقىندار باس قوساتىن القالى كەشتە بايگە العان جۇلدەگەرلەر جىردان شاشۋ شاشسا، تانىمال ونەرپازداردىڭ قاتىسۋىمەن جاركەن بودەش ۇلىنىڭ ولەڭىنە جازىلعان اندەرى شىرقالىپ، جاۋھار جىرلارى  وقىلاتىن بولادى.

شىعارماشىلىق كەشتىڭ وتەتىن ورىنى مەن ناقتى ۋاقىتى الدىن الا اقپارات قۇرالدارى ارقىلى جاريالانادى.

Back to top button