Қазақстан бір айда 862 мың тонна астық пен ұн экспорттады

Еліміз астық пен ұн экспорты бойынша жоғары көрсеткіш көрсетіп отыр, деп хабарлайды Ауыл шаруашылығы министрлігінің баспасөз қызметі.  ҚР Қаржы министрлігінің Мемлекеттік кірістер комитеті мен «ҚТЖ» АҚ-ның деректері бойынша Қазақстан қазан айында шетелге 862 мың тоннаға жуық астық пен ұн саудалады. Оның ішінде 617 мың тонна бидай, 164 мың тонна бидай ұны (235 мың тонна астық эквивалентінде) және 9,7 мың тонна арпа бар. Бидай мен ұнның басым бөлігін Өзбекстан (327,6 мың тонна), Ауғанстан (230,3 мың тонна) және Тәжікстан (150,5 мың тонна) сатып алды. Арпаның барлық көлемі дәстүрлі түрде Иранға экспортталған. Естеріңізге салсақ, бұған дейін ҚР Ауыл шаруашылығы министрі Сапархан Омаров биыл Қазақстанның диқандары жоғары сапалы дәнді дақылдар алғанын атап өткен болатын. Сонымен қатар, ҚР АШМ басшысы Қазақстанның астық пен ұнды сату мәселелеріндегі экспорттық стратегиясы коронавирус пандемиясына қарамастан өзгерістерге ұшырамайтынын мәлімдеген. 27 қазанда ҚР Президенті Қасым-Жомарт Тоқаев ҚР Ауыл шаруашылығы министрлігінің басшысымен кездесу өткізіп, өңделген өнім экспортының көлемін ұлғайтуды және отандық аграршылар үшін жаңа нарық ашу бойынша белсенді жұмыс жүргізуді тапсырды.  

Серіктес жаңалықтары