Онлайн оқыту: еліміздің 883 ауылында интернет жоқ

ҚР Цифрлық даму, инновациялар және аэроғарыш өнеркәсібі министрлігі Телекоммуникациялар комитетінің төрағасы Виталий Ярошенко: «Қазіргі уақытта кеңжолақты интернетті қолжетімді ететін желілер 6 459 елдімекеннің 4 646-сында салынған. Осы елдімекендерде 18,2 млн адам, халықтың 97,3% тұратынын атап өткен жөн. Nur Otan партиясының сайлауалды тұғырнамасы бар, онда жыл соңына дейін 250 және одан да көп адам тұратын барлық ауылдық елдімекендерді интернетпен қамтамасыз ету тапсырылған. Қазіргі уақытта интернетпен қамтылмаған 883 ауыл қалды», – деп атап өтті. Оның айтуынша, ауылдарды интернетпен қамтамасыз ету үшін екі жоба жүзеге асырылуда. Бірінші жоба «Талшықты-оптикалық байланыс желісі технологиясы бойынша елдімекендерді кеңжолақты қолжетімділікпен қамту» деп аталады. «Жоба бойынша мемлекет мектептер, ауруханалар мен әкімдіктер үшін ауылдық елдімекендерде кеңжолақты интернетті қолжетімді ететін қызмет түрін сатып алады. Жоба 2020 жылдың соңына дейін 1 257 ауылдағы 3 718 мемлекеттік орган мен бюджеттік ұйымдарды қамтиды», – деді В.Ярошенко.