جاڭالىقتار

كارانتين كەزىندە اۋاداعى ۋلى زاتتار مولشەرى 60 ەسە ازايعان

ەكولوگيا، گەولوگيا جانە تابيعي رەسۋرستار ۆيتسە-ءمينيسترى احمەتجان پىرىمقۇلوۆ كارانتين كەزىندە  نۇر-سۇلتان مەن الماتى قالالارىندا اۋا  ساپاسى قالاي وزگەرگەنىن ايتتى. 

ۆيتسە-ءمينيستردىڭ ايتۋىنشا ، بۇگىندە قازگيدرومەت رەسپۋبليكا بويىنشا اۋانىڭ ساپاسىن باقىلاپ وتىرادى. ال كارانتين ەنگىزىلگەننەن كەيىن استانا مەن الماتىداعى جاعداي ەرەكشە باقىلاۋعا الىنعان.

«الماتىعا جاسالعان تالداۋ بويىنشا قالانىڭ تومەنگى جاعىندا اۋادا قالقىپ جۇرەتىن PM 2,5 – PM 10 بولشەكتەرىنىڭ مولشەرى شامادان اسىپ تۇر. ونداي قالدىقتار، كوبىنەسە، جەس، جەس-2 مەن جەس-3-تەن شىعادى. دەگەنمەن، قالانىڭ ۇستىڭگى جاعىندا گازداردىڭ ايتارلىقتاي ازايعانى بايقالىپ وتىر. اتاپ ايتقاندا، ازوت توتىعى مەن ازوت ديوكسيدى تومەندەدى. ال اۋاداعى فەنولدىڭ مولشەرى وتكەن جىلمەن سالىستىرعاندا  60 ەسەگە ازايعان»، – دەدى پىرىمقۇلوۆ بۇگىنگى ونلاين بريفينگتە.

ونىڭ سوزىنە قاراعاندا، كارانتين كەزىندە، كوبىنەسە، كولىكتەردەن شىعاتىن زياندى قالدىقتاردىڭ كولەمى تومەندەدى.

«ەلوردانىڭ اۋماعىندا وسىنداي قالدىقتاردىڭ ازايعانى تىركەلىپ وتىر. الايدا ءىرى ونەركاسىپتىك كاسىپورىندار مەن جىلۋ ەلەكتر ستانتسيالارى ءوز جۇمىسىن جالعاستىردى. سوندىقتان وسى نىسانداردان شىعاتىن قالدىقتار بار»، – دەپ اتاپ كورسەتتى پىرىمقۇلوۆ.

ۆيتسە-مينيستر استانانى گازداندىرۋ جانە الماتىدا جىلۋ ەلەكتر ستانتسيالارىن گازعا كوشىرۋ شارالارى دا وڭ ناتيجە بەرەتىنىن جەتكىزدى. سونداي-اق، پىرىمقۇلوۆ ءىرى كاسىپورىنداردىڭ وتىنىشىنە قاراماستان،  كوروناۆيرۋس پاندەمياسىنا بايلانىستى جاڭا ەكولوگيا كودەكسىن قابىلداۋ كەيىنگە شەگەرىلمەيتىنىن مالىمدەدى.

 

Back to top button