Көкшетауда ерлі-зайыпты зейнеткерлерді қатыгездікпен өлтірген күдікті ұсталды

Ақмола облыстық Полиция департаментінің баспасөз қыметі Көкшетауда ерлі-зайыпты зейнеткерлерді қатыгездікпен өлтірген күдікті ұсталғанын хабарлады. ҚазАқпарат жазғандай, сәуірдің 30 күні Көкшетауда аса қатыгездікпен қинап өлтірілген 1937 жылғы ер адам мен оның 1943 жылғы жұбайының денесі өз пәтерінде табылған болатын. Аса ауыр қылмыстың бетін ашуға Ақмола облысының Полиция департаменті мен Көкшетау қаласының полиция басқармасының жеке құрамы тартылды. Тәжірибелі тергеушілерден тұратын жедел тергеу тобына ПД бастығы А.Баймурзин жетекшілік етті. «Бірнеше нұсқалар қаралды. Нәтижесінде жедел тергеу шарасы кезінде күдікті анықталып, Көкшетау қаласында қолға түсті. Белгілі болғандай, сәуірдің 29-ы күні Щучье қаласының 24 жастағы тұрғыны тонау үшін Есенберлин көшесінің бойында орналасқан көпқабатты тұрғын үйдің бірінші қабатындағы пәтерге кірген. Алайда, оны үй иелері көріп қалған, ол қылмыстың ізін жасыру үшін ерлі-зайыптыларды өлтіріп, жеке мүліктерін алып кеткен. Ұсталған кезде, күдіктіден заттай дәйектер алынды. Қазіргі кезде ол уақытшы ұстау оқшаулағышына қамалды. Сондай-ақ, ҚР ҚК 99 бабының 2 бөлігі бойынша сотқа дейінгі тергеу амалдары жүргізілуде», – деп түсіндірді ПД баспасөз қызметіндегілер. Ведомстводан атап өткендей, өзге ақпарат тергеу мүддесіне орай жарияланбайды.

Серіктес жаңалықтары