COVID-19: Қытай дәрігерлері Нұр-Сұлтанға келді

Бүгін Қазақстан Әскери Әуе күштері әскери-көлік авиациясының С-295 екі ұшағы Жетіген-Үрімші-Нұр-Сұлтан бағыты бойынша маңызды ұшу сапарын орындады. Әскери ұшқыштар Елордаға Қытайдан 10 дәрігер және 5,5 тонна жүкті, негізінен медициналық жабдықтар мен дәрі-дәрмектерді жеткізді. Медициналық мамандар тобы Қытайдан қазақстандық тараптың шақыруы бойынша келді. Оның құрамында COVID-19 инфекцияның алдын алу және оны емдеуде қажетті тәжірибесі бар Шыңжаң-Ұйғыр автономиялық ауданының білікті дәрігерлері бар. Қытай делегациясының миссиясы коронавирусқа қарсы күресте қазақстандық медицина қызметкерлеріне консультациялық-әдістемелік көмек көрсету. Шыңжаң мамандары аурудың алдын алу, бақылау, байланыстарды анықтау және оқшаулаудың қытайлық механизмімен таныстырады. Олар қазақстандық медициналық мамандардың қолданыстағы клиникалық емдеу хаттамаларына өз ұсынысын айтып, тәжірибелерімен бөліседі.

Серіктес жаңалықтары