Шымкентте 200 орындық жедел госпиталь салынуы мүмкін: 2 сәуір 2020, жаңалықтар Turkystan.kz

Шымкентте 200 орындық жедел госпиталь салынуы мүмкін

Шымкентте 200 орындық жедел госпиталь салынуы мүмкін Шымкент қаласында 200 орындық жедел госпиталь салу жоспарлануда. Қалалық денсаулық сақтау басқармасы басшысының орынбасары Айгүл Бекбауованың хабарлауынша, қалада 1 456 төсек орынға арналған карантиндік стационарлар қарастырылған. Дегенмен, бүгінгі күні 200 төсек-орынды жедел салынатын инфекциялық госпиталь салу қажеттілігі туындап, аталмыш мәселе қарастырылып жатыр. «Қала бойынша қажет төсек-орындар, госпитальдар толық дайын. Нақтырақ айтқанда, қалада барлығы 680 төсек-орынға арналған провизорлық стационарлар бар. Мәселен, қалалық жұқпалы аурулар ауруханасында – 180 төсек, «Мейірім» оңалту орталығында - 120 төсек, «Атамекен» медициналық орталығында - 380 төсек орын дайындалған», - дейді А.Бекбауова.

Бүгінгі таңда Шымкентке кіретін жолдардағы блок бекеттерде 18 жедел медициналық жәрдем бригадасы кезекшілікке қойылған. Бастапқы медициналық санитарлық көмек ұйымдарынан 45 орта медициналық қызметкер үш ауысымда жұмыс істеуде. Блок бекеттердегі медициналық пункттер 52 тепловизормен, обаға қарсы 71 қорғаныс костюмімен жабдықталған.