شقو-دا اباي قۇنانباي ۇلىنا ارنالعان ەسكەرتكىش قويىلدى

شىعىس قازاقستان وبلىسى، اباي اۋدانىندا شاكارىم قۇدايبەردى ۇلىنىڭ 160 جىلدىعى جانە اباي اۋدانىنىڭ 90 جىلدىق مەرەيتويى اتالىپ ءوتىلدى، دەپ حابارلايدى قازاقپارات.

بيىل « ۇلىلار مەكەنى» اتانعان كيەلى جەر – اباي اۋدانىنىڭ قۇرىلعانىنا 90 جىل.  وسىعان وراي، ابايعا اۋدان ورتالىعىنان قولادان ەسكەرتكىش ورناتىلدى.  بۇعان اۋدان جۇرتشىلىعى، اۋداندا تۋىپ-وسكەن  بەلگىلى ازاماتتار مەن جەكە كاسىپكەرلەر دەمەۋشىلىك جاساعان. ال اينالاسىن اباتتاندىرۋ جۇمىستارىنا قاراجات جەرگىلىكتى بيۋدجەتتەن بولىنگەن. ۇلى اباي ەسكەرتكىشىن، بەينەسىن قولادان سومداپ شىققان  كاسىبي ءمۇسىنشى، ابايلىق نۇربول  قاليەۆ. بيىكتىگى 4 مەتر 60 سم بولاتىن ەسكەرتكىشكە ءمۇسىنشى جارتى جىلىن جۇمساعان ەكەن.

«اباي قۇنانباي ۇلىنىڭ زاماناۋي ەسكەرتكىشى اۋداننىڭ اجارىن ارتتىرىپ، ساۋلەتىنە ءسان بەرەتىن، رۋحاني كۇش سىيلايتىن كورنەكتى ورىنعا اينالاتىنىنا سەنىمىمىز مول»، – دەدى وبلىس اكىمى دانيال احمەتوۆ.

مەرەكە بارىسىندا تويعا قاتىسۋشى قوناقتار اۋدان ورتالىعىنداعى شاكارىم ەسكەرتكىشىنە تاعزىم ەتىپ، گۇل شوقتارىن قويۋ ءراسىمى ءوتتى. شاكارىم شىعارمالارى مەن اندەرى ناسيحاتالدى. سودان كەيىن اۋدان ورتالىعىنداعى كىتاپحانادا جازۋشى مەدەۋ سارسەكەنىڭ  «اباي الەمى» سەرياسىمەن جارىق كورگەن كوپتومدىق كىتابىنىڭ تۇساۋى كەسىلدى.  ءوز كەزەگىندە جازۋشى باستاماعا قولداۋ بىلدىرگەنى ءۇشىن وبلىس اىمىنە العىسىن ءبىلدىردى.

اۋدان مەرەيتويىنا وراي   جۇزۋ باسسەينى اشىلدى.  وبلىس اكىمى دانيال احمەتوۆتىڭ تىكەلەي قولداۋىمەن اشىلعان باسسەين  قاراپايىم اۋىل بالالارىن قولداۋ، سپورتتىڭ جاڭا تۇرلەرىن دامىتۋ ماقساتىندا  جاسالعان جۇمىستاردىڭ ناتيجەسى. زامان تالابىنا ساي سالىنعان سپورتتىق  نىسان  كۇنىنە 40 ادام قامتىماق. بەس جولاقتى باسسەيننىڭ ۇزىندىعى – 25 مەتر،ەنى – 8،5 مەتر، تەرەڭدىگى -1،30-1،80 مەتر.

ۇقساس جاڭالىقتار

Back to top button