БИЫЛ 8,3 МЫҢ ШАҒЫН НЕСИЕ БЕРІЛДІ

«ҚазАгро» Ұлттық Басқарушы Холдингі» еншілес компаниясының «Ауыл шаруашылығын қаржылай қолдау қоры» АҚ 2005 жылдан бастап еліміздің қаржы нарығында табысты қызмет етіп келеді. Қордың негізгі мақсаты – ауыл тұрғындарының кәсіппен айналысу үшін несие алуына барынша көмектесу, олардың хал-ахуалын жақсартып, аяқтан нық тұруға жәрдем беру. Осы орайда, «Ауыл шаруашылығын қаржылай қолдау қоры» акционерлік қоғамының Басқарма төрағасы Нармұхан Қалмаханұлы Сарыбаевқа бірнеше сұрақ қоюдың сәті түсті.

– «Ауыл шаруашылығын қар­­жылай қолдау қоры» ауыл тұр­ғын­дарына биыл қандай көмек көрсете алды?

– Шынтуайтына келгенде, 2013 жыл оңай болған жоқ, дегенмен ауыз толтырып айтатын жетістіктеріміз де баршылық. Ауыл тұрғындары мен ауыл шаруашылығы тауарларын өндірушілерді несиелендіру көлемі екі есеге дерлік ұлғайды. 2012 жылы жалпы сомасы 11,2 млрд. теңге көлемінде 5 мың несие берілсе, үстіміздегі жылы бұл көрсеткіш 20 млрд. теңгені құраған 8,5 мың несиеге дейін өсті. Несиелеу саны мен көлемінің өсуі ең алдымен «Жұмыспен қамту – 2020» Жол картасына байланысты жүзеге асып отыр.

Сонымен қатар, біз бірнеше жаңа несие өнімін аштық. Олардың бірі – Ислам Даму Банкінің қаражаты негізінде жүзеге асырылған «Мурабаха» бағдарламасы. Ислам қағидатының негізінде бөлшектеп несиелендіруді Қор елімізде тұңғыш рет енгізді. Елдің алды болу қашан да оңай іс емес. Десек те, біз Ислам Даму Банкінің қойған барлық талаптары мен өзімізге жүктелген міндеттерді орындай алдық. Жуық арада Банк тарапынан бөлінген 10 млн. АҚШ доллары толық мөлшерде ауылдық шағын несие түрінде беріледі.

Атап өткен жөн, биылғы жылы біз «Жылыжай» бағдарламасын қайта жандандырдық. Бағдарлама негізінде еліміздің оңтүстік аймақтарында фермерлік шағын жылыжайлар құрылысы қарқын алды.

Бұған қоса, несиелендіру шарт­тары бойынша несие алушыларға қойылатын талаптар да біршама жеңілдетілді. Мысалы, кепіл саясаты жұмсарып, несие қайтару мерзімі ұзартылды және т.б.

Жалпы, 2013 жылдың маңызды нәтижелерін де атап кеткен жөн: 3 жыл көлемінде «Сыбаға» бағдарламасы бойынша 3 мың несие берілді, «Дипломмен ауылға» бағдарламасы бойынша тұрғын үй сатып алу үшін 10 мыңыншы жас маманға несие берілді. «Егінжай», «Шағын несие беру ұйымдарын несиелендіру», «Бизнес-аймақтар», «Кәсіпкер» және тағы басқа бағдарламалар сәтті орындалуда.

– Яғни, әрбір ауыл тұрғыны өз кәсібін жүргізу үшін, мейлі ол мал шаруашылығы, цех немесе жеке шаштараз ісі болсын, Сіздерге келіп несие алуға мүмкіндігі бар ма?

– Дәл солай. Өзіңіз айтқан кәсіптердің барлығы – бүгінгі ауыл тынысының негіздері. Егін салу мен мал басын өсіру ғана емес, цехтар, дүкендер, қызмет көрсету орындарын ашу – бұлардың барлығы ауыл инфрақұрылымына кіреді және ауылдың жағдайын жақсартады. Біздің басты мақсатымыз – қаржы құралдарын пайдаланып, Қазақстан ауылдарының әл-ауқатын көтеру.

Осы тұста айта кетерлік жайт, қандай да болмасын қар­жы­ландыру бағдарламасының табысты орындалуы оның шарт­тарында ғана емес. Табыс көзі ең алдымен – адамдарда. Яғни, бағдарламаны жүзеге асыратын мамандар ауыл тұрғындарымен тіл табысып, бағдарлама талаптарын түсіндіретін, тиісті құжаттар әзірлеуге көмектесетін, несие қаражатын мақсатты жұмсалуын қадағалап, қайтарылуын бақылау қажет. Біздің негізгі ресурсымыз – шалғайда қызметте жүрген біздің қызметкерлеріміз. Оларға менің алғысым шексіз. Жаңа енгізілім, мөлшер өсімі, уақыт пен мамандар тапшылығына қарамастан олар өз міндеттерін адал атқара білді.

– Атқарылған жұмыстар ауқымды екені көрініп тұр. Келесі жылы тағы қандай іс-шаралар жоспарда бар?

– Келер жылға жоспарымыз көп. Біздің басты бағытымыз, ұста­нымымыз – ҚР Ауыл шаруашылығы министрлігі әзірлеген «Аргобизнес – 2020» бағдарламасын орындау. Осы бағдарлама аясында біз ұсақ фермерлік шаруашылықты, отбасылық сүт фермаларын,­ фермерлік жылыжайларды қар­жы­ландыру жөніндегі несиелік өнімдерімізді жүзеге асыратын боламыз. Сонымен қатар, ауыл шаруашылығы мен аймақтарды дамыту бойынша басым бағыттарды орындау негізінде ауыл кәсіпкерлерін «Жұмыспен қамту – 2020» Жол картасы бойынша несиелендіру шаралары да жалғасатын болады.

Дайындаған 

Көлбай ЖЕҢІС

Астана 

Серіктес жаңалықтары