ءشيى شىققان كولىككە شۇكىرلىك ايتاتىندار

قازاقستاننىڭ كولىك نارىعى ناتيجەلى دامىپ كەلەدى. بيىل اۆتوكولىك سالاسىنداعى ساۋدا-ساتتىق 2017 جىلمەن سالىستىرعاندا ەكى ەسەگە ءوستى. وعان قوسا، بيىل وتاندىق اۆتوكولىك نارىعىندا ەسكى تەمىر تۇلپارلاردىڭ ساتىلىمى جوعارىلاعان.

2018 جىلدىڭ العاشقى ءۇش ايىندا ەلىمىزدەگى كولىك نارىعىندا 5 مىڭنان استام اۆتوموبيل ساۋدالاندى. ولاردىڭ جالپى سوماسى – 26 ملرد تەڭگە. قازاقستاندىقتاردى كوبىنە رەسەي مەن وڭتۇستىك كورەيانىڭ كولىكتەرى قىزىقتىراتىن كورىنەدى. ءبىر ايتا كەتەرلىگى، وسى جىلى جاڭا تەمىر تۇلپارلارعا ەمەس، ەسكى كولىكتەرگە دەگەن سۇرانىس ارتا ءتۇسىپتى. رەسپۋبليكا بويىنشا كۇندەلىكتى ساتىلاتىن 16 كولىكتىڭ 15-ءى ەسكى اۆتوموبيلدەر. وعان كولىك قۇنىنىڭ كۇن وتكەن سايىن قىمباتتاۋى سەبەپ. سوڭعى جارتى جىل ىشىندە بۇرىن مىنىلگەن تەمىر تۇلپارلاردىڭ ءوزى 500 مىڭ تەڭگەگە قىمباتتاعان. ال جاڭا كولىك تىزگىندەۋگە نيەتتىلەرگە دوللارعا بايلانعان باعا مۇمكىندىك بەرمەي وتىر. سوندىقتان، قاراپايىم جۇرتشىلىق دامىعان ەلدەردەن قالعان ەسكى كولىكتەردى قاناعات تۇتۋعا ءماجبۇر.

ىشكى ىستەر مينيسترلىگى ۇسىنعان دەرەكتەرگە سۇيەنسەك، بيىل ەلىمىزدە 80 324 كولىك تىركەۋگە الىنعان. ولاردىڭ 70 پايىزى 2008 جىلعا دەيىن شىعارىلعان كولىكتەر. ال 20 جىلدان اساتىن كولىكتەر 38، 11 جىلدان 20 جىلعا دەيىنگىلەر 30، 8-دەن 10 جىلعا دەيىن 5،8 پايىز، 4-تەن 7 جىلعا دەيىن 21،3 پايىزدى قۇراپ وتىر.  قازىرگى ۋاقىتتا مىڭ قازاقستاندىقتىڭ تەك ۇشەۋى عانا جاڭا كولىك ساتىپ الۋعا قاۋقارلى. ەۋروپامەن سالىستىرساق، ولاردا بۇل كورسەتكىش ون ەسە كوبىرەك. كورشى رەسەيدىڭ وزىندە 1000 ازاماتتىڭ 11-ءى سالوننان اۆتوموبيل ءمىنىپ شىعادى. ايتا كەتەيىك، ءتول تەڭگەمىز بەن كورشى ەل ۆاليۋتاسىنىڭ سوڭعى كۇندەرى كۇرت تومەندەگەنىنە قاراعاندا كولىكتەردىڭ قۇنى تاعى وسە ءتۇسۋى ابدەن ىقتيمال.

اۆتوكولىك ساۋداسىنداعى تاعى ءبىر قۋانىشتى جاڭالىق – وتاندىق اۆتوكولىكتەردىڭ ساتىلىمىنىڭ ارتقاندىعى. مىسالى، 2018 جىلدىڭ العاشقى ءۇش ايىندا 7 مىڭعا جۋىق تەمىر تۇلپار كونۆەيەردەن شىعارىلدى. قازاقستاندىق اۆتوبيزنەس قاۋىمداستىعىنىڭ ەسەپتەۋى بويىنشا، «ازيا اۆتو» زاۋىتىندا 4411 اۆتوكولىك قۇراستىرىلعان، «سارىارقااۆتوپروم» زاۋىتى قاڭتار-ناۋرىز ايلارىندا 2108 جەڭىل، جۇك كولىگىن جانە اۆتوبۋس شىعارعان. اقمولا «كاماز ينجينيرينگ» 121 جۇك كولىگىن، الماتىلىق Hyundai Trans Auto 44 تەحنيكا شىعارعان بولسا، سەمەيلىك Daewoo Bus I توقساندا 15 كولىك شىعارىپ شۇكىرلىك ايتىپ وتىر. ءۇش ايدا شىعارىلعان تەحنيكانىڭ جالپى قۇنى 39،5 ملرد تەڭگە. بۇل وتكەن جىلعى كورسەتكىشتەن ەكى ەسە جوعارى. وتاندىق زاۋىتتار بىلتىر جالپى سوماسى 139 ملرد تەڭگەگە 20 مىڭعا جۋىق تەمىر تۇلپار قۇراستىرىپ شىعارعان بولاتىن. قازاقستان اۆتوكولىك بيزنەسى قاۋىمداستىعىنىڭ بولجاۋىنشا، 2018 جىلى اۆتونارىق ءوسىمى تاعى 15-20 پايىزعا ۇلعايا تۇسپەك.

مۇنداي جوعارى كورسەتكىشكە قول جەتكىزۋگە سەبەپ بولعان فاكتورلار از ەمەس. ەڭ ءبىرىنشى، وتاندىق كاسىپورىندا شىعاراتىن كولىك مودەلدەرى كوبەيدى. بۇگىندە قازاقستاندىق زاۋىتتار اۆتوكولىك برەندتەرىنىڭ 140-تان استام ءتۇرىن وندىرەدى. ەكىنشىدەن، «جەڭىلدەتىلگەن اۆتونەسيە» باعدارلاماسى ءۇشىن ۇلتتىق قوردان قوسىمشا 8 ملرد تەڭگە ءبولىندى. بۇعان دەيىن ەكى ترانشپەن بولىنگەن 26 ملرد تەڭگە قاراجات تولىق يگەرىلگەن. «بۇل باعدارلاما مەملەكەت پەن بانك جۇيەسىنىڭ جانە ناقتى جەكە كاسىپورىن اراسىنداعى ىنتىماقتاستىقتى نىعايتتى»، – دەيدى سالا ماماندارى. ياعني، مەملەكەت كولىك سالاسىن دامىتۋ ماقساتىندا ەلىمىزدە قۇراستىرىلعان تەمىر تۇلپارلاردى تومەن پايىزدىق نەسيەگە الۋعا مۇمكىندىك بەرىپ وتىر. 2015 جىلدىڭ ءساۋىر ايىنان بەرى اتالمىش باعدارلاما بويىنشا 10 مىڭنان استام قازاق­ستاندىق ازامات جاڭا كولىككە قول جەتكىزدى.

 

 

 

ۇقساس جاڭالىقتار

Back to top button