جاڭالىقتار

«جاڭا زامان ادەبيەتىنىڭ» ادەمى كەشى

«جاڭا زامان ادەبيەتى» سەرياسىمەن شىققان كىتاپتار 45 اتاۋدان تۇرادى، ونىڭ ىشىندە 25 پروزالىق جانە 19 پوەزيالىق شىعارمالار. ءدال وسىلاي، «دراماتۋرگيا» بولىگى بويىنشا «تاۋەلسىزدىك تولعاۋى» بايقاۋىنىڭ ەڭ ۇزدىك پەسالارى توپتاستىرىلعان «ورىلگەن ءومىر ورنەگى» اتتى كىتاپ باسىلىپ شىقتى.

شىعارىلعان كىتاپتار ىشىنەن فاريزا ونعارسىنوۆا، قادىربەك سەگىزبايۇلى، راحىمجان وتارباەۆ، اكىم تارازي، نۇرعالي وراز، جۇسىپبەك قورعاسبەك، گۇلنار سالىقباي، ۇلىقبەك ەسداۋلەت، مارحابات بايعۇت، تولەن ابدىك، نەسىپبەك ءداۋتايۇلى، سەرىك اقسۇڭقارۇلى، قۋاندىق تۇمەنباي، نۇرلان ماۋكەن، رافاەل نيازبەكوۆ، جولتاي ءالماشۇلى، ەسەنقۇل جاقىپبەك، نەسىپبەك ايتۇلى، باۋىرجان جاقىپ سىندى بەلگىلى اقىندار مەن جازۋشىلاردىڭ جاڭا تۋىندىلارىن اتاۋعا بولادى.

مەملەكەتتىك تاپسىرىسپەن شىعارىل­عان كىتاپتارعا ۇستىمىزدەگى جىلى رەسپۋب­لي­ك­الىق بيۋدجەتتەن 1 093 286 مىڭ تەڭگە ءبولىنىپ، جالپى تارالىمى 816 430 دانانى قۇرايتىن 407 اتالىم كىتاپ شىعارىلىپ، رەسپۋبليكالىق كىتاپحانالارعا تەگىن تاراتىلعان.

تۇساۋكەسەر ءراسىمىن مادەنيەت جانە اقپارات ۆيتسە-ءمينيسترى ارمان قىرىقباەۆ اشتى. «جاڭا زامان ادەبيەتى» سەرياسىمەن شىققان كىتاپتار – تاۋەلسىزدىك جىلدارى جارىق كورگەن تاڭداۋلى شىعارمالاردىڭ باسىن بىرىكتىرەدى، – دەيدى ول. – سونداي-اق ءتول ادەبيەتىمىزگە ۇلەس قوسىپ جۇرگەن قالامگەرلەرىمىزگە قانات بىتىرەدى دەپ ويلايمىن. ويتكەنى ولاردىڭ ىشىندە ادەبيەتتىڭ اعا بۋىن وكىلدەرىنەن باس­تاپ، جازعاندارى زامان تالابىنا ساي كەلەتىن جاستاردىڭ دا شىعارمالارى بار. شىندىعىنا كەلسەك، ءدال قازىرگى كەزدە قازاق ادەبيەتى قايتادان جاڭعىرۋ الدىندا تۇر: جاقىندا ءبىز «جاس تولقىن» سەرياسىن قولعا الماق بولىپ ەدىك، جاس اقىنداردىڭ ءوزى وتىزعا جاقىنداپ قالدى. بۇل دەگەنىمىز، قازاق ادەبيەتىنىڭ بولاشاعى الدا دەگەن ءسوز»، – دەي كەلىپ، بارشا قالامگەرلەرگە شىعارماشىلىق تابىستار تىلەدى.

سودان سوڭ ءسوز العان مادەنيەت جانە اقپارات مينيسترلىگىنىڭ اقپارات جانە مۇراعات كوميتەتى توراعاسىنىڭ ورىنباسارى قۋات بوراش «جاڭا زامان ادەبيەتى: پروزا، پوەزيا، دراما» سەرياسىمەن 2012 جىلى باسىلىپ شىققان كىتاپتارعا شولۋ جاسادى. «جاڭا زامان ادەبيەتى» سەرياسىندا بەلگىلى ءبىر ۇيلەسىمدىلىكتىڭ بار ەكەنىن جانە شىعارىلعان كىتاپتاردا شىعارمانىڭ مازمۇنى ەسكەرىلگەنىن، بۇرىن-سوڭدى باسپا بەتىن كورمەگەن تۋىندىلارعا جول اشىلعانىن اتاي كەلىپ، قازىرگى قازاق ادەبيەتىنىڭ دەڭگەيىن وسى كىتاپتاردان اڭعارۋعا بولاتىندىعىن جەتكىزدى.

ال جارىققا شىققان تۋىندىلار جونىندە مىرزاتاي جولداسبەكوۆ، تولەن ابدىك، دۇكەنباي دوسجانوۆ، نەسىپبەك ايتۇلى، الىبەك اسقار، مەرەكە قۇلكەنوۆ، عاريفوللا انەس، جۇسىپبەك قورعاسبەك، تەمىرعالي كوپباەۆ سەكىلدى قالامگەرلەر مەن باسپاگەرلەر ءوز پىكىرلەرىن ءبىلدىردى. – سەرياعا ەنگەن تۋىندىلار، اسىرەسە حالىقتىڭ رۋحاني-ءبىلىم جانە اقىل-وي، مادەنيەتتىلىك دەڭگەيىنىڭ جوعارىلاۋىنا، وسكەلەڭ ۇرپاقتى تاربيەلەۋگە جاعداي جاسايدى، – دەيدى تۇساۋكەسەرگە قاتىسۋشىلار.

شىنىندا دا، «جاڭا زامان ادەبيەتى» سەرياسىمەن شىققان كىتاپتار مەملەكەتتىك ۇس­تانىمدى; ۇلتتىق، ەتيكالىق، مادە­نيەت­تى­لىك، رۋحاني قۇندىلىقتاردى، بيىك ونەگەلى جانە پاتريوتتىق سەزىمدى قالىپتاستىرىپ، بولشاق ۇرپاقتى جان-جاقتى تاربيەلەۋگە سەپ بولارى ءسوزسىز. ەندەشە، «جازار كوبەيسىن، جازىلعان شىعارمانى جارىققا شىعاراتىن باسپا مەن جاناشىر جاندار كوبەيسىن!» – دەپ تىلەيىك. سوندا وسىنداي حالىققا، قوعامعا قاجەتتى شاراعا بىردەن ءبىر مۇرىندىق بولىپ وتىرعان مينيسترلىكتىڭ دە مارتەبەسى ارتىپ، بەدەلى ودان سايىن بەكەم بولا تۇسەدى.

بازاربەك تۇكىباي

استانا

Back to top button