ديماش اعا سۇيگەن ءان

قر مادەنيەت مينيسترلىگى، الماتى قالاسىنىڭ مادەنيەت باسقارماسى جانە حالىقارالىق د.ا. قوناەۆ قورىنىڭ قولداۋىمەن جامبىل جاباەۆ اتىنداعى قازاق مەملەكەتتىك فيلارمونياسىندا مەملەكەت جانە قوعام قايراتكەرى دىنمۇحامەد احمەت ۇلىنا ارنالعان «د.ا.قوناەۆتىڭ سۇيىكتى اندەرى» اتتى قايىرىمدىلىق كونتسەرت بولىپ ءوتتى.

قايىرىمدىلىق كەشتە روزا رىمباەۆا، ەسكەندىر حاسانعاليەۆ، نۇرعالي ءنۇسىپجانوۆ، لاكي كەسوگلۋ، نۇرلان ابدۋللين سىندى بەلگىلى ونەر جۇلدىزدارى مەن جاس تالانتتار ونەر كورسەتتى. كونتسەرتتى ن.تىلەنديەۆ اتىنداعى «وتىرار سازى» فولكلورلىق-ەتنوگرافيالىق وركەسترى سۇيەمەلدەدى. «قوناەۆ قورىنىڭ» ۆيتسە-پرەزيدەنتى، قوعام قايراتكەرى، ەڭبەك ارداگەرى كەڭەس اۋحاديەۆ كىرىسپە ءسوز سويلەدى. ونەر شىمىلدىعىن ءبىرىنشى بولىپ كۇيشى-كومپوزيتور، تولعاۋشى ءشامىل ءابىلتاي ءوزىنىڭ «اعاتاي، اسقاق ءان» انىمەن اشتى.XX ع. 60-80-ءشى جىلدارى ەلىمىزدىڭ مادەنيەتى مەن ونەرىنىڭ ەرەكشە دامىعان جۇلدىزدى كەزەڭى بولدى. د.ا. قوناەۆتىڭ باسشىلىعىمەن ەلىمىزدە جاڭا مادەني وشاقتار اشىلىپ، تەاتر مەن كونتسەرتتىك ۇيىمداردىڭ بۇرىن بولماعان جاڭا تۇرلەرى دۇنيەگە كەلگەن بولاتىن. سونى ەسكە الىپ بەلگىلى ءانشى لاكي كەسوگلۋ: «بارلىق كەڭەس زامانىنىڭ ادامدارىنا سەكىلدى، مەن ءۇشىن دە دىنمۇحامەد قوناەۆتىڭ ورنى ەرەكشە. ول ونەردى ءسۇيدى، قاستەرلەدى. جەكە تانىس بولماسام دا، «حالىق ءارتىسى» اتاعىن سول كىسىنىڭ مورىنەن الدىم. وعان دەگەن قۇرمەتىم شەكسىز»، – دەسە، ەلىمىزدىڭ ەركەسى روزا رىمباەۆا: «بالا كەزىمنەن ونەر جولىندا ماعان قامقور بولعان اعامدى ەشقاشان ۇمىتپايمىن. مەن عانا ەمەس، بارشا قازاق جۇرتى ديمەكەڭدى ماڭگى ەستە ساقتايدى دەپ ويلايمىن»، – دەدى. ال ەسكەندىر حاسانعاليەۆ: «دىنمۇحامەد قوناەۆ دەگەندە مەنىڭ جاستىعىم ەسىمە تۇسەدى. 90-جىلداردىڭ باسىندا تەاتردا العاشقى كەشىمدى وتكىزدىم. ديماش اعانى شاقىردىم، بەتىمدى قايتارمادى. سودان باس­تاپ ارالاستىق»، – دەدى.

نۇرعالي ءنۇسىپجانوۆ 2 جاسار نۇرگۇل ەسىمدى قىزىن ەرتىپ ديماش اعانىڭ ۇيىندە قوناقتا بولىپتى. سول كەزدە دىنمۇحامەد قوناەۆ ماڭدايىنان ءسۇيىپ، باتاسىن بەرگەن قىز ونىڭ سۇيىكتى اندەرىنىڭ ءبىرى سانالاتىن «ياپۋر-ايمەن» فرانتسيادا وتكەن ن. رۋبينشتەين اتىنداعى حالىقارالىق پيانيستەر بايقاۋىنىڭ جۇلدەگەرى اتاندى. جەڭىسىن ديماش اعاعا ارناپ، كورەرمەن قاۋىمنىڭ قوشەمەتىنە بولەندى. حالىق اندەرىمەن بىرگە كەشتە نۇرعيسا تىلەنديەۆ پەن ءشامشى قالداياقوۆتىڭ تۋىندىلارى ورىندالدى. ونەر كەشى ەسكەندىر اعامىزدىڭ «اتامەكەن» انىمەن اياقتالدى.

نازگۇل ابۋشارىپقىزى

ۇقساس جاڭالىقتار

Back to top button