АРСЫЗДЫҚ ПЕН АЗҒЫНДЫҚҚА АПАРАР АМАЛ

Қарт қара жер бүгінге дейін қаншама зұлмат қылмыстар мен ауыр күнәларды көтеріп келгені мәлім. Бір белгілісі, қасиетті Құранның тәліміне сүйенсек, қара жердің өзі үстінде жасалған барлық жақсылық пен жамандықты баян ететін күн келеді (Қараңыз: «Зілзала» сүресі, 4-аят). Алайда осы бір ақиқатқа көз жұма қарап, жер бетінде арсыздық пен азғындықты жайған залымдар тарихта аз болмаған. Хайуан екеш хайуан да жасамайтын кейбір қылықтар адам бойынан табылды. Мәселен адамды Құдайға емес, өзіне табындырған Перғауынның өлімі, Лұт қауымының жер бетінен тып-типыл жойылуы, Нұх пайғамбар (ғ.с.) сөзіне құлақ аспағандарды тірідей жұтқан топан су, бәрі де азғындық пен шектен шығушылықтың салдары еді.

Енді, міне, ғасырлар бойы мұсылман болып келген қазақ елі небір зұлматтардан аман өтіп, жаңа заманға аяқ тіреп, еңсесін тіктеп, иманды өмірге бет бұра бастағанда, «жер астынан жік шықты, екі құлағы тік шықты». Сарыарқаның төсінде, дәлірек айтқанда, әсем қала Астанада жас­тар арасында сорақы сайыс өткізу туралы «бастама» есті жұртты елең еткізді һәм ұлт пен дін жанашырларының наразылығын тудырды. Оған 13 шілде күні өтетін сайыста Астана жастарының ардан безуі себеп болмақ. Осынау бәлелі істің басы-қасында жүрген Ербол Құшұғылов осыған дейін (2010 жылдың 25 желтоқсанында) «Нұр Астана» мешіті жанындағы «ASIA PARK» сауда үйінде тырдай жалаңаштар жарысын өткізіп, ұлттық ар-намысты аяқ асты еткені есімізде. Енді екі күн бойы (48 сағат) бұғанасы бекімеген, рухани діңгегі қатпаған жастарды жұрт көзінше сүйістіріп, бойларын арсыздыққа үйретпек. Жастарды жалаңаштау да, сүйістіру де – түптеп келгенде ұлтты азғындыққа салудың алғашқы баспалдақтары.

Бұл – біздің елдің имандылығы мен адамшылығын сарапқа салары анық. «Күнәлі іспен «Гиннес» кітабына енеміз» деген ойдың өзі неткен қорқынышты, әрі жиіркенішті.

Сан ғасырдан бері ұлының иманы мен қызының ибасын өміріне тірек етіп келген момын қазақтың ішінен осындай пайымсыз тентегін тыятын атқамінер табылмайды дегенге сенгіміз келмейді.

Күні кеше ғана бүкіл қазақ мұсыл­ман ел екенімізді айдай әлемге паш ет­тік. Ғажайып «Әзірет Сұлтан» ме­шіті ашылды. Міне, бүгінде рухани ке­лісімнің ордасына айналған Астанада ұлт болашағы – ұл мен қызымызды сүйісуден жарыстыру қаншалықты орынды? Ай дейтін ажа, қой дейтін қожа болмаса, ертең елімізде ашық зина жасаудан байқау өткіземіз дейтіндер шықпасына кім кепіл?

Адамзаттың асылы ардақты пайғам­ба­ры­мыз Мұхаммед Мұстафа (с.ғ.с.) хадистерінің бірінде: «Егер бір жамандықты көрсең, қолмен түзет, оған шамаң келмесе, тілмен айт, оған да күшің жетпесе, жүрекпен жек көр. Бұл – иманның ең әлсізі», – деген.

Ендеше ел төрінде осындай сорақы істі болдырмауға баршамыз жауаптымыз. Сондықтан «арым – жанымның садағысы» деп өткен арда қазақтың бүгінгі ұрпақтары бұл іске бей-жай қарамайды деген сенімдеміз.

Ұқсас жаңалықтар

Back to top button