4 Наурыз 2018, 16:30 893 0 Білім Анар ЛЕПЕСОВА

Павлодарлық оқушының жобасы ТМД елдері арасында үздік атанды

Павлодар облысы Баянауыл ауданының №2 жалпы орта мектебінің оқушысы Ратмир Настас Мәскеуден жүлделі оралды, деп хабарлайды pavlodarnews.

Мәскеу қаласында өткен «Шекарасыз ғылым: Қазақстан-Ресей» атты ІІІ Халықаралық ғылыми-тәжірибелік конференциясында Баянауыл ауданының №2 жалпы орта білім беретін мектебінің 8 «б» сынып оқушысы Ратмир Настас І орын иегері атанды. Бұл туралы аудандық білім беру бөлімінің бас маманы Махаббат Сәдуақасова айтты.

«Гуманитарлық, жаратылыстану және физика-математика бағытында өткен аталмыш байқауда ТМД елдерінен кіл мықты 100-ден астам оқушы мен студент қатысқан. Біздің Қазақстанның атынан барған  Ратмир ел үмітін ақтап келді. Оны дайындаған жетекшілері, педагог-психологтар Полина Шумейко мен Марина Шумейконың еңбектері зор екенін атап өткен жөн. Олар ұстаздарға арналған «Жаңа технологиялар мен педагогикалық практика» атты ІІІ Халықаралық ғылыми-тәжірибелік конференцияда дипломдармен марапатталды», - дейді Махаббат Сәдуақасова.

Марина Шумейконың айтуынша,  Ратмир  Настас  «Баянауыл ұлттық паркінің экожүйесіндегі кіші ақтісті жертесерді қорғау» тақырыбындағы жобасын сәтті қорғап, экология секциясында  «Шекарасыз ғылым: Қазақстан-Ресей» медалі мен дипломға ие болған.

 

Соңғы жаңалықтар