جاپوندار تىككەن كيىم جەڭىس اپەرمەدى

وڭتۇستىك كورەيانىڭ پحەنچحان قالاسىندا وتكەن ءححىىى قىسقى وليمپيادا دا مارەسىنە جەتتى. اسىرەسە، ءتورت جىلدا ءبىر رەت وتەتىن بايراقتى باسەكەنى سپورتشى قاۋىم ەرەكشە كۇتەتىنى راس. بۇل – تالاي جىلعى ەڭبەكتىڭ ناتيجەسىن كورسەتەتىن مۇمكىندىك. بابى كەلىسكەن ۇمىتكەردىڭ باعى دا جاناتىنى بەلگىلى. ال مۇنىڭ ەكەۋى دە ءبىزدىڭ سپورتشىلاردى اينالىپ وتسە شە؟!

ءححىىى قىسقى وليمپيادا ويىندارىنا ەلىمىزدەن 46 سپورتشى باردى. ارينە، جولداماعا يە بولعاننىڭ ءبارى جەڭىس شىڭىنا كوتەرىلەدى دەگەن ءسوز ەمەس. الايدا بۇعان دەيىن سپورت دودالارىندا جاقسى ناتيجە كورسەتىپ، جەڭىس تۇعىرىنان كورىنىپ جۇرگەن ساڭلاقتارعا ءۇمىت ارتىلدى. ولار فريستايلدىڭ موگۋل تۇرىنەن شىققان يۋليا گالىشەۆا، فريستايل-اكروباتيكا بويىنشا جارىسقا تۇسكەن جانبوتا الدابەرگەنوۆا، شاڭعىشى الەكسەي پولتورانين، بياتلونشى گالينا ۆيشنەۆسكايا، داريا كليمينا، ولگا پولتورانينا، الينا رايكوۆا، سكياتلون سايىسى بويىنشا اننا شەۆچەنكو مەن ەلەنا كولومينا، مانەرلەپ سىرعاناۋشى دەنيس تەن، فريستايلشى دميتري رەيحەرد، سونداي-اق، وسى ويىندارعا ءۇش جىل بويى گوللانديادا جاتتىققان شورت-ترەك قۇراماسى، ت.ب. بىراق بۇل ۇكىلەپ اپارعان «ۇزدىكتەردىڭ» كەيبىرى جيىرمالىققا دا ىلىنبەي قالدى. «شورت-ترەك قۇراماسىن كۇشەيتۋى ءتيىس» دەپ وڭتۇستىك كورەيادان شاقىرتقان كيم يونگ ا دا ىرىكتەۋدەن وتە المادى. ءيا، الەمنىڭ 92 ەلىنەن 3 مىڭعا جۋىق سپورتشى مەن رەسمي وكىل قاتىسقان ايتۋلى سپورت جارىسىندا توپ جارۋ وڭاي ەمەس. دەسەك تە، بايتاق ەل 46 سپورتشىنىڭ ىشىندە ءبىر يۋليا گالىشەۆانىڭ جالعىز قولا جۇلدەسىن مىسە تۇتىپ، شۇكىرشىلىك ەتەمىز دەپ ويلاپ پا ەكەن؟! ءتىپتى، قازاقستان قۇراماسىنا وسى وليمپياداعا ارناپ كيىم تىككەن جاپون كومپانياسىنىڭ دا ءۇمىتى جەلگە ۇشتى. بالكىم، ساراپشى-ماماندار ايتپاقشى، ۇلتتىق وليمپيادا كوميتەتى مەن سپورت جانە دەنە شىنىقتىرۋ ىستەرى كوميتەتى باسشىلارىنان سۇراۋ الىپ، جاۋاپقا تارتاتىن كەز كەلگەن شىعار؟!

سپورتشىنىڭ كوز جاسى نەمەسە كۇتپەگەن ساتسىزدىك

«تالاي سىننان سۇرىنبەگەن ساڭلاق ەدى» دەپ، تاعاتى ابدەن تاۋسىلعان قازاق جانكۇيەرلەرى مەن ماماندار بايراقتى باسەكەنىڭ سوڭعى كۇنىندە جارىس جولىنا شىققان شاڭعىشى الەكسەي پولتورانيننەن جەڭىس كۇتكەنى انىق. ءتىپتى، پولتورانين دە، ونىڭ جەكە باپكەرى ەستونيالىق ماتي الاۆەر دە جۇلدە الاتىندارىنا سەنىمدى ەدى. جارىستان ءۇش كۇن بۇرىن قاتاڭ مالىمدەمە جاساعان ماتي الاۆەر شاكىرتى مەدال الماسا، وسى ماۋسىمدا العان جالاقىسىن قايتارىپ بەرەتىنىن ايتتى. «مەن حوك باسشىسى حۋانا انتونيو سامارانچتىڭ سپورتتاعى ەڭ ماڭىزدى دۇنيە سپورتشى دەگەن پىكىرىمەن تولىق كەلىسەمىن. سپورتتا جاتتىقتىرۋشىنىڭ ءرولى ەرەكشە. ول سپورتشىمەن جاۋاپكەرشىلىكتى تەڭدەي كوتەرۋى كەرەك. سوندىقتان سپورتشىنىڭ سايىستاعى ناتيجەسىنە ەڭ الدىمەن باپكەر جاۋاپتى. ەگەر الەكسەي جۇلدەسىز قالسا، وسى ماۋسىمداعى بۇكىل جالاقىمدى قايتارىپ بەرۋگە دايىنمىن. بۇل ارەكەتىم باسقا دا جاتتىقتىرۋشىلارعا ۇلگى بولادى دەپ ويلايمىن»، – دەدى الاۆەر. ەندى نە بولار ەكەن؟ «ايتىلعان ءسوز – اتىلعان وق» دەمەكشى، ماتي الاۆەر سوزىندە تۇرا ما، الدە… الايدا التىن القا تاعادى دەگەن ارداگەر سپورتشى وندىققا دا ىلىنبەدى. ول شاڭعى سپورتىنان ەرلەر اراسىندا وتكەن 50 شاقىرىمدىق كلاسسيكالىق جارىستا 15-ءشى ورىنعا جايعاسىپ، جۇلدەسىز قالدى.

بۇل قاشىقتىقتا التىندى فينليانديالىق يۆو نيسكانەن، كۇمىس رەسەيلىك الەكساندر بولشۋنوۆ، قولانى تاعى ءبىر رەسەي سپورتشىسى الەكسەي لاركوۆ يەلەنگەن-ءدى. ارينە، وكىنىشتى جاعداي. الەكسەيدىڭ مارە سىزىعىن كەسكەن ساتتە جەر باۋىرلاپ جاتقانىنىڭ ءوزى ايانىشتى. ءبازبىر سپورتشىلار سياقتى ىرجالاقتاپ تۇرعان جوق. كەۋدەسىن نامىس وتى ورتەپ بارا جاتقانى انىق سەزىلدى. ول ول ما، جارىستان كەيىن جۋرناليستەر الدىنا كەلگەن پولتورانين جىلاپ تۇرىپ، سۇحبات بەرە المادى. ءوز-وزىنە كەلگەننەن كەيىن عانا ءبىر-ەكى ساۋالعا جاۋاپ بەرگەن ول: «تەك التىن الۋدى كوزدەدىم. ءتىپتى، كۇمىس نە قولا الۋ تۋرالى ويلاعان ەمەسپىن. ناتيجەسىندە ەشتەڭە ۇتپادىم. كۇشىم سارقىلىپ قالدى. كوزىمدەگى وت تا ءوشتى. وليمپيادانى ۇتۋ ماعان جازىلماعان سياقتى. نە بولعانىن ءوزىم دە تۇسىنە الار ەمەسپىن. نەگىزى وليمپيادا ويىندارى مەن باق سىنايتىن جارىس ەمەس ەكەن»، – دەگەن.

1994 جىلعى وليمپيادا چەمپيونى، تانىمال قازاقستاندىق شاڭعىشى ۆلاديمير سميرنوۆتىڭ پىكىرىنشە، جانكۇيەرلەردىڭ ا.پولتورانينگە دەگەن سەنىمى جايدان-جاي تۋىنداماعان. جاعدايدىڭ بۇلاي قالىپتاسۋىنا الەكسەيدىڭ الەم كۋبوگىنىڭ كەزەڭدەرىندەگى ناتيجەلەرى وڭ ىقپال ەتكەن. «وكىنىشكە قاراي، ول قاشىقتىقتىڭ سوڭىنا دەيىن پسيحولوگيالىق، تاكتيكالىق تۇرعىدان شىداي المادى. ونىڭ دايىندىعى جاقسى بولاتىن، جارىستىڭ باسىندا ءبارىن دە دۇرىس ىستەدى. ەگەر جارىس بارىسىندا وزىمەن جارىسقا شىققاندارعا قاراپ، پسيحولوگيالىق تۇرعىدا سىر بەرگەن بولسا، جاعدايعا قاراي ءتيىستى شەشىم قابىلداپ، تاكتيكاعا كوشىپ، ەڭ قۇرىعاندا قولاعا قول جەتكىزۋى كەرەك ەدى. وسى مىندەتتى ول ورىنداي المادى»، – دەدى ۆلاديمير سميرنوۆ.

بۇل – 31 جاستاعى ءپولتورانيننىڭ سپورت مانسابىنداعى ءتورتىنشى وليمپياداسى. ونىڭ سپورتتىق ءومىربايانى اۋىز تولتىرىپ ايتارلىق كورسەتكىشكە تولى. 2013 جىلى يتاليادا وتكەن الەم چەمپيوناتىندا 50 شاقىرىمدىق كلاسسيكالىق ادىسپەن جۇگىرۋدە جانە كوماندالىق سپرينت جارىسىندا قولا مەدال جانە الەم كۋبوگى كەزەڭدەرىندە وننان استام التىنعا قول جەتكىزدى. 2011 جىلى الماتى مەن استانادا وتكەن ازيا ويىندارىنىڭ ءتورت دۇركىن چەمپيونى.

ەل اتىنان بايراقتى باسەكەگە قاتىسقان سپورتشىلاردىڭ ساتسىزدىككە ۇرىنۋىنا كىم كىنالى؟ سوڭعى ەكى جىلدا تىڭعىلىقتى دايىندىق جۇرگىزگەن ۇمىتكەرلەردە نەگە جەڭىسكە دەگەن ۇمتىلىس بولمادى؟ ەڭ تاڭدانارلىعى، ءبىر-بىرىمەن اقىلداسىپ العان با، كوبىنىڭ جارىستان كەيىن تىلشىلەرگە بەرگەن جاۋابى ءبىر سارىندى. «دوداعا شىقپاس بۇرىن جاراقات الىپ ەدىم. سول كەدەرگى جاسادى» نەمەسە «اۋا رايىنىڭ قولايسىزدىعى كەرى اسەرىن تيگىزدى»، ءتىپتى، «پسيحولوگيالىق جاعىنان دايىن بولمادىم» دەگەندى كوپ ەستىدىك. ءۇش جىل بويى گوللانديادا مەملەكەتتىڭ ەسەبىنەن جاتتىققان ابزال اجىعاليەۆ، دەنيس نيكيشا، نۇربەرگەن جۇماعازيەۆ تا ناتيجەلەرىنە كوڭىلى تولمايتىنىن ايتتى. كوز جاسىنا ەرىك بەرگەن جۇماعازيەۆتىڭ: «جارىس كەزىندە ەكى رەت قۇلاپ، پسيحولوگيالىق جاعىنان جينالا المادىم. ءۇش جىل بويى گوللانديادا دايىندالعان ەڭبەگىمىز ناتيجەسىز بولدى. توككەن تەر اقتالمادى. جىبەرگەن قاتەلىكتىڭ بارىنە ءوزىم كىنالىمىن» دەگەنى اقتالۋ ما، الدە بويداعى سەنىمسىزدىكتى سەيىلتۋ مە؟

سەنىم ارتقان سپورتشىلاردىڭ كوبى جۇلدەسىز قالدى. ەڭ وكىنىشتىسى، سەنىم ارتقان ساڭلاقتار مەدالسىز قالىپ جاتقاندا جارق ەتىپ، جارىپ شىعاتىن ەشكىم بولمادى. ءبىز پولتورانين مەن دەنيس تەندى اناعان دا، مىناعان دا تىقپالاي بەرەمىز. وسى سپورتشىلاردىڭ ءىزباسارلارىن دايىنداساق، كىم كەدەرگى؟ مىسالى، شاڭعىدان رەسەيدىڭ نەگىزگى قۇراماسىنداعى سپورتشىلار بۇل وليمپيادادان شەتتەتىلدى. ەسەسىنە، جاستار كەلدى دە، بىرنەشە مەدالدى قورجىنعا سالدى. سەبەبى باسقا ەلدە دەر كەزىندە الماستىرا قوياتىن، ءوز كەزەگىن كۇتىپ وتىرعان قوسالقى سپورتشىلار كوپ. ال قازاقستان ۇنەمى ءبىر «جۇلدىزعا» عانا ءۇمىت ارتادى. ساڭلاقتاردىڭ ورنىن باساتىن «سارى اۋىزدار» جوق.

قىسقى سپورتتا قاراكوزدەر نەگە از؟

ەلىمىزگە ءبىر قولا مەدالدى عانا بۇيىرتقان پحەنچحانداعى قىسقى وليمپيادا كوپكە دەيىن ەستە قالاتىن بولدى. بىراق سپورت جارىس جولىنداعى جەڭىس پەن جەڭىلىستەن عانا تۇرمايدى. ونىڭ قوسالقى ىقپالى كوپ.

كەيبىرەۋلەر «وليمپياداعا قاتىسىپ جاتقان سپورتشىلاردىڭ كوبى – وزگە ۇلت وكىلدەرى. سپورتتىق سايىستاردا نەگە قاراكوزدەر از؟» دەپ وزگەلەردى ورىنسىز كۇستانالاۋعا دايار. بىراق ءوزى نەگە ءاۋ باستان قىسقى سپورتتى تاڭداپ، جارىق «جۇلدىز» بولماعانىن ءتۇسىندىرىپ بەرە المايدى. راسىندا، تاعى دا «كىم كىنالى؟» دەگەن زاڭدى سۇراق تۋادى وسىندايدا. بۇگىندە قازاقستان اتىنان شىعىپ جۇرگەن سپورتشىنىڭ كوبىن اتا-اناسى بالا كەزىنەن باۋلىپ، يكەمدەگەن. ارينە، بالانى سپورتتىڭ ءبىر تۇرىنە بەرىپ، ودان ناتيجە شىققانىن كۇتۋ، ءبىرىنشى قارجىنى، ەكىنشى توزىمدىلىكتى تالاپ ەتەدى. ال الەۋمەتتىك جاعدايىن تۇزەي الماي جۇرگەن قازاق وتباسى بالاسىن قالاي سپورتقا بەرەدى؟ بۇل – ءبىر. ەكىنشى، قىسقى سپورت ۇيىرمەلەرى تىم قىمبات. ەكىنىڭ ءبىرىنىڭ قالتاسى كوتەرمەيدى. ەگەر جاعداي كەرىسىنشە بولسىن دەسەك، بالالار مەن جاسوسپىرىمدەر، جالپى بۇقارالىق سپورتتى دامىتۋ كەرەك. ول ءۇشىن مەملەكەتتىڭ ناقتى جانە ۇزاق جىلدارعا ارنالعان ساياساتى بولۋى ءتيىس. ءۇشىنشى، ەلىمىزدە قىسقى ازيادا جانە ۋنيۆەرسيادا ويىندارى ءوتتى. سول ايتۋلى دودادان كەيىن قىسقى سپورت تۇرلەرى بويىنشا سپورت مەكتەپتەرى مەن ۇيىرمەلەرگە قانشا بالا جازىلدى نەمەسە قاتىسىپ ءجۇر؟ قىسقى سپورت جارىستارى وتكەن ورىندار قوعامنىڭ قاراپايىم وكىلدەرى ءۇشىن اشىق پا؟ الدە، بىزدە جاتتىقتىرۋشى جوق پا؟ ماسەلە – وسىندا.

سودان كەيىن دە، باسقا ەلدىڭ اتىنان قاتىسقان قازاق قىزىنىڭ جەتىستىگىن ايتىپ، شاتتانىپ ءجۇرمىز. ءبازبىر اقپارات قۇرالدارى: «قازاق قىزى – تۇڭعىش وليمپيادا چەمپيونى اتاندى! باعىڭ جانسىن، دينارا! قازاق ەلى سەنى ءوز قىزىنداي كورەدى. تاريحي وتانداستارىڭ ءبىر-بىرىنەن ءسۇيىنشى سۇراپ، «اق تۇيەنىڭ قارنى جارىلدى» دەپ مارە-سارە بولىپ جاتىر»، – دەپ بوركىن اسپانعا اتا قۋاندى. ءيا، بياتلوننان ايەلدەر اراسىنداعى ەستافەتا جارىسىندا بەلارۋس قۇراماسى اتىنان شىققان دينارا الىمبەكوۆانىڭ قازاق قىزى ەكەنى راس. 1996 جىلى 5 قاڭتاردا قاراعاندى قالاسىنىڭ ىرگەسىندەگى اباي اۋىلىندا دۇنيەگە كەلگەن دينارانىڭ اكەسى – قازاق، شەشەسى – بەلارۋس. ءۇش جاسىندا اتا-اناسىمەن بىرگە بەلارۋس رەسپۋبليكاسىنىڭ موگيلەۆ وبلىسىنداعى چاۋسى قالاسىنا قونىس اۋدارادى. اۋەلى شاڭعىمەن جۇگىرۋ سپورتىنا بارىپ، كەيىننەن بياتلونعا اۋىسقان. ورتا مەكتەپتە دەنە تاربيەسى ءپانىنىڭ مۇعالىمى گەننادي تاەۆسكي دينارانى شاڭعىعا باۋلي باستايدى. بىراق ۇلكەن سپورتقا دەگەن قادامى 11 جاسىندا باستالدى. 2015 جىلى ءوز ەلىندە وتكەن جاس­وسپىرىمدەر اراسىنداعى الەم چەمپيوناتىندا التىنعا يە بولدى. ال وليمپيادا ويىندارىنا العاش رەت قاتىسقان دينارا الەمنىڭ ماڭدايالدى ۇزدىكتەرىمەن تايتالاسىپ، ءوزىنىڭ ءاليا مەن مانشۇكتىڭ وتانىنان شىققان مەرگەن قىز ەكەندىگىن كورسەتىپ، وليمپيادا چەمپيونى اتاندى. ءدال وسى ەستافەتادا باق سىناعان بىردە-ءبىر قازاق قىزى جوق ۇلتتىق قۇراما 14-ورىندى قاناعات تۇتقان ەدى. دينارا قازىر الەم كۋبوگىنىڭ جالپى ەسەبىندە 73-ورىندا تۇر. بىراق ءبارىمىز بوركىمىزدى اسپانعا اتىپ، وڭتۇستىك كورەيانىڭ كوك شۋلان بۇلتىنا ىلسەك تە، دينارا وزگە ەلدىڭ ازاماتى. ول بەلارۋسكە قونىس اۋدارعالى قازاق-ستانعا ءبىر-اق رەت، جەتى جاسىندا كەلىپتى. بەلارۋس مەملەكەتتىك دەنە تاربيەسى ينستيتۋتى تۇلەگىنىڭ كومانداداعى لاقاپ اتى – دينوزاۆريك. پحەنچحانداعى جەڭىستەن كەيىن بەلارۋس ۇلتتىق وليمپيالىق كوميتەتى دينارا ءبىلىم العان چاۋسى جاسوسپىرىمدەر سپورت مەكتەبىنە 15 مىڭ بەلارۋس ءرۋبلىن اۋدارماقشى كورىنەدى. سونداي-اق، بەلارۋس پرەزيدەنتى الەكساندر لۋكاشەنكو وليمپيادا چەمپيوندارىن «جەكە ەرلىگى ءۇشىن» وردەنىمەن ماراپاتتاۋ تۋرالى جارلىققا قول قويدى.

ارينە، قازاق قىزى – دينارا الىمبەكوۆانىڭ جۇلدىزى جارقىراي تۇسكەنىنە قۋانىشتىمىز. «اتتەڭ، دينارا قازاقستان قۇراماسى اتىنان شىقسا عوي» دەگەن وكىنىش وزەكتى ورتەيتىنى راس. دەگەنمەن ايتۋلى دودالاردا تۇساۋىن كەسىپ جاتقان ەلىمىزدەگى جاس سپورتشىلاردىڭ بولاشاعى زور. اتاپ ايتقاندا، فريستايل اكروباتيكادان 12-ورىنعا تابان تىرەگەن ايانا جولداس نەبارى 16 جاستا. جاس سپورتشى 4 جىلدان كەيىن وتەتىن بەيجىڭدەگى قىسقى وليمپيادا ويىندارىندا بابىندا بولاتىنىنا سەنىمدى. سونداي-اق، سپورتتىڭ وسى سايىسى بويىنشا وليمپياداعا العاش قاتىسقان 17 جاستاعى مارجان اقجىگىت تە، فريستايلدىڭ موگۋل تۇرىنەن باسەكەگە تۇسكەن 16 جاستاعى اياۋلىم امىرەنوۆانىڭ دا كەلەشەگىنەن ءۇمىت مول. ال مانەرلەپ سىرعاناۋدان سىنعا تۇسكەن 18 جاستاعى ەليزابەت تۇرسىنباەۆا مەن ايزا مامبەكوۆانىڭ دا باعى جاناتىن كۇن الىس ەمەس. تەك 2022 جىلى بەيجىڭدە وتەتىن وليمپيادادا بابى بەن باعى قاتار شاپسىن دەپ تىلەيىك.

سونىمەن، ەكى اپتا بويى كوگىلدىر ەكرانعا تەلمىرتكەن سپورت مەرەكەسى ءتامام. ءبىر قىزىعى، 2014 جىلى رەسەي سوچيدە وتكەن قىسقى وليمپياداعا 51 ملرد اقش دوللارىن جۇمساسا، وڭتۇستىك كورەيا پحەنچحانداعى وليمپيادانى 13 ملرد اقش دوللارىمەن-اق اتقارعان كورىنەدى.

قازاقستان پحەنچحان وليمپياداسىن جالپى ەسەپتە 28-ورىنمەن اياقتادى. العاشقى ۇشتىك قاتارىندا – 39 مەدالمەن (14 التىن، 14 كۇمىس، 11 قولا) نورۆەگيا، ەكىنشى ورىندا 31 مەدالمەن (14 التىن، 10 كۇمىس، 7 قولا) گەرمانيا، ءۇشىنشى ورىندا 29 مەدالمەن (11 التىن، 8 كۇمىس، 10 قولا) كانادا تۇر. ايتپاقشى، بۇل وليمپيادا كەزىندە دە جاپون شورت-ترەكشىسى كەي سايتون رۇقسات ەتىلمەگەن دارۋمەندى قولدانعانى ءۇشىن جارىستان شەتتەتىلسە، رەسەيلىك بوبسلەيست نادەجدا سەرگەەۆا جانە كەرلينگتەن قولا مەدال العان رەسەيلىك سپورتشى الەكساندر كرۋشەلنيتسكي دوپينگ ەرەجەسىن بۇزدى دەگەن كۇدىككە ءىلىندى. بۇل جاعداي ونسىز دا دوپينگ داۋىنان ارىلا الماعان رەسەي ءۇشىن وڭاي تيمەگەنى انىق. بۇدان بۇرىن سپورتتىق اربيتراج سوتى (CAS) جولداما العان 169 سپورتشىنىڭ جارىسقا تاۋەلسىز جانە بەيتاراپ تۇردە قاتىسىپ، «رەسەيلىك وليمپيادا سپورتشىلارى» دەگەن توپ رەتىندە وليمپيادا تۋىنىڭ استىندا جۇلدەگە تالاسادى» دەگەن شەشىم شىعارعان ەدى. ال حالىقارالىق وليمپيادا كوميتەتى (حوك) پحەنچحان وليمپياداسى اياقتالعانعا دەيىن «رەسەيلىك وليمپيادا سپورتشىلارى» دوپينگ ەرەجەسىن بۇزباسا، جابىلۋ سالتاناتىنا رەسەي تۋىمەن شىعۋى مۇمكىن ەكەنىن دە حابارلاعان. وليمپيادانىڭ سوڭعى كۇنى ءباسپاسوز ءماسليحاتىن وتكىزگەن حوك پرەزيدەنتى توماس باح: «رەسەيدىڭ تۋىن جارىستىڭ جابىلۋ سالتاناتىنا دەيىن قايتارعىمىز كەلگەن. پحەنچحانداعى ەكى رەسەيلىك سپورتشىنىڭ دوپينگپەن ۇستالعانى رەسەي تۋىن قايتارۋعا ۇلكەن كەدەرگى بولدى. سوندىقتان رەسەيدىڭ حوك قاتارىنا قاشان ورالاتىنى بەلگىسىز»، – دەپ قىسقا قايىردى. جابىلۋ سالتاناتى كەزىندە ءدۇيىم جۇرتتىڭ الدىنا شىعىپ، مەدالدارىن تاعىنعان رەسەيلىك شاڭعىشىلار الەكساندر بولشۋنوۆ پەن الەكسەي لاركوۆتىڭ كوزىنەن ءوز ەلىنىڭ تۋىنىڭ كوتەرىلمەگەنىنە ىشتەي قاپالى ەكەنى انىق بايقالدى.

تاعى ءبىر ايتا كەتەرلىگى، اقش بياتلون فەدەراتسياسى رەسەيدىڭ تيۋمەن قالاسىندا ناۋرىز ايىندا وتەتىن الەم كۋبوگى جارىسىنا بويكوت جاريالادى. فەدەراتسيا بۇل تۋرالى مالىمدەمەسىن Twitter الەۋمەتتىك جەلىسىندەگى رەسمي پاراعىندا جاريالاعان. مالىمدەمەدە رەسەيدىڭ دۇنيەجۇزىلىك دوپينگكە قارسى اگەنتتىك كودەكسىنە ءالى كۇنگە ساي ەمەستىگى، ال بۇل ەلگە كەلەتىن سپورتشىلارعا قاۋىپ توندىرەتىنى جايىندا ايتىلعان. وسىلايشا، اقش بياتلون فەدەراتسياسى حالىقارالىق بياتلون فەدەراتسياسىنىڭ الەم كۋبوگى جارىسىن تيۋمەن قالاسىندا وتكىزۋ تۋرالى شەشىمىن قۇپتامادى.

 

 

ۇقساس جاڭالىقتار

Back to top button