شەتەل ەلشىلەرى نۇرسۇلتان نازارباەۆقا سەنىم گراموتالارىن تابىس ەتتى

ەلباسى  نۇرسۇلتان نازارباەۆ قازاقستانداعى توتەنشە جانە وكىلەتتى ەلشى بولىپ تاعايىندالعان بىرقاتار شەتەلدىڭ ديپلوماتىنان سەنىم  گراموتاسىن قابىلدادى، دەپ حابارلايدى قازاقپارات.

اتاپ ايتقاندا، مەملەكەت باسشىسىنا ەستونيا رەسپۋبليكاسىنىڭ ەلشىسى حەيتي مياەمەەس، اۋعانستان يسلام رەسپۋبليكاسىنىڭ ەلشىسى كادام شاح شاحيم، پولشا رەسپۋبليكاسىنىڭ ەلشىسى سەليم حازبيەۆيچ، كانادا ەلشىسى نيكوليا برۋسسو، فينليانديا رەسپۋبليكاسىنىڭ ەلشىسى ميككو كيۆيكوسكي، بەلگيا كورولدىگىنىڭ ەلشىسى الەكسي دە كرومبريۋگحە  دە پيكەنداەل، فرانتسيا رەسپۋبليكاسىنىڭ ەلشىسى  فيليپپ مارتينە سەنىم گراموتاسىن  تاپسىردى.

«بۇگىن سىزدەر ءۇشىن ەڭبەك جولدارىڭىزدىڭ جاڭا كەزەڭى باستالىپ وتىر. قازاقستانداعى ديپلوماتيالىق ميسسيالارىڭىز تابىستى بولادى دەپ سەنەمىن. سىزدەر ءبىزدىڭ ەل تاريحىنداعى جاڭا داۋىرگە كۋا بولاسىزدار. قازاقستاننىڭ ءۇشىنشى جاڭعىرۋىن ىسكە اسىرۋعا كىرىستىك. «رۋحاني جاڭعىرۋ» اتتى اۋقىمدى باعدارلاما ءار ازاماتىمىز ءۇشىن ەرەكشە مانگە يە بولادى»، – دەدى سەنىم گراموتاسىن قابىلداعاننان كەيىن ەلشىلەرگە ءسوز ارناعان قازاقستان پرەزيدەنتى.

سونىمەن قاتار مەملەكەت باسشىسى تاياۋدا ەلوردادا ەكسپو-2017 حالىقارالىق كورمەسىنىڭ اياقتالعانىن، وعان 115 ەل مەن 22 حالىقارالىق  ۇيىم قاتىسقانىن، ءسويتىپ، مامانداندىرىلعان كورمەلەر اراسىندا قاتىسۋشىلار سانى بويىنشا رەكورد  جاسالعانىن اتاپ ءوتتى.

«استانا سامميتىندە شىۇ-عا  ءۇندىستان مەن پاكىستان قوسىلدى.  سول ارقىلى ۇيىمنىڭ تاريحىندا جاڭا كەزەڭگە جول اشىلدى. ەندى ونىڭ قىزمەتى اياسى 3 ميللاردتان استام تۇرعىنى بار اۋماقتى قامتيتىن بولادى. ءبىز يىۇ-نىڭ عىلىم، تەحنولوگيالار جونىندەگى ءبىرىنشى ءسامميتىن وتكىزدىك. وندا تىڭ يدەيالار ايتىلىپ، ماڭىزدى ناتيجەلەرگە قول جەتكىزدىك. 29 تامىز يادرولىق سىناقتارعا قارسى ءىس-قيمىل كۇنى ءبىزدىڭ تاعى ءبىر باستامامىز جۇزەگە استى. ول – ماگاتە-ءنىڭ  تومەن بايىتىلعان ۋران بانكى عيماراتىنىڭ اشىلۋى.  استانا پروتسەسى زورلىق-زومبىلىقتى توقتاتۋعا، سيريانىڭ تاعدىرىن شەشۋگە نەگىز قالادى»، – دەپ اتاپ ءوتتى ەلباسى.

 

ۇقساس جاڭالىقتار

Back to top button