ۋاقىت قىسقا، كۇڭكىل كوپ

وتكەن اپتادا ءماجىلىستىڭ جالپى وتىرىسىندا دەپۋتات كارىباي مۇسىرمان ۆيتسە-پرەمەر ەربولات دوساەۆقا دەپۋتاتتىق ساۋال جولداپ، ورىمدەي ۇل-قىز ءوسىرىپ وتىرعان بارلىق وتباسىلاردىڭ ورتاق تىلەگىن جەتكىزدى. اتا-انالار جۇمىستان 18.00-دە بوسايتىندىقتان بالالارىن بالاباقشادان دەر كەزىندە الىپ كەتە الماي قيىندىق كورىپ جۇرگەنىن ايتقان حالىق قالاۋلىسى ەلىمىزدەگى مەملەكەتتىك بالاباقشالاردىڭ جۇمىس ۋاقىتىن ءبىر ساعاتقا ۇزارتۋدى سۇرادى. 

«بۇگىنگى تاڭدا ەلىمىزدەگى كاسىپورىندار مەن مەكەمەلەردە، جەرگىلىكتى جانە ورتالىق مەملەكەتتىك ورگانداردا سابيلەرى مەكتەپكە دەيىنگى مەملەكەتتىك ۇيىمدارعا باراتىن جۇزدەگەن مىڭ اتا-انا ەڭبەك ەتىپ ءجۇر. ولار ءۇشىن قازىر ءوز بۇلدىرشىندەرىن بالاباقشادان ۋاقىتىندا الىپ كەتۋ – ەلەۋلى ماسەلەگە اينالىپ وتىر. سەبەبى بىرىنشىدەن، ەلىمىزدەگى مەكتەپ جاسىنا دەيىنگى مەملەكەتتىك بالالار مەكەمەلەرى نەگىزىنەن تاڭعى ساعات 7.30-دان كەشكى 18.00-گە دەيىن عانا جۇمىس ىستەيدى. اتا-انالاردىڭ كوپشىلىگىنىڭ جۇمىس ۋاقىتى دا 18.00-گە دەيىن بولعاندىقتان، ولار بالاباقشاعا بەلگىلەنگەن مەرزىمدە بارىپ ۇلگەرە الماي، قيىندىق كورىپ ءجۇر»، – دەدى دەپۋتات ءماجىلىستىڭ جالپى وتىرىسىندا.

ەكىنشىدەن، ونىڭ ايتۋىنشا، كەي جەرلەردە ساعات 18.00-دەن كەيىن بالاباقشا عيماراتىنىڭ ىشىندە قالۋعا رۇقسات ەتىلمەگەندىكتەن، بالالار مەن تاربيەشىلەر اتا-انالاردى اۋا رايىنىڭ قانداي جاعدايىندا بولسىن، سىرتتا، بالاباقشا  اۋلاسىندا كۇتۋگە ءماجبۇر. الداعى قىسقى مەزگىلدە بۇعاناسى بەكىمەگەن سابيلەردىڭ ءوز اتا-اناسىن بالاباقشا اۋلاسىندا سۋىق اۋادا كۇتىپ قالۋى ولاردىڭ دەنساۋلىعىنا دا زارداپ تيگىزەرى انىق.

«ۇشىنشىدەن، تاربيەشىلەرگە بەكىتىلگەن جۇمىس ۋاقىتىنان تىس قىزمەت كورسەتكەنى ءۇشىن قوسىمشا اقى تولەۋ قاراستىرىلماعاندىقتان، ولار بالالارىن ۋاقىتىندا الىپ كەتپەگەن اتا-انالارعا رەنىش ءبىلدىرىپ، ءوزارا كيكىلجىڭ تۋىنداۋدا. تورتىنشىدەن، كەيبىر اتا-انالار بالاباقشاعا تەزىرەك جەتۋ ءۇشىن اسىعىپ، جەكە كولىكتەرىنىڭ جىلدامدىعىن اسىراتىندىقتان، ولار ءىرى ەلدى مەكەندەردە، اسىرەسە، ۇلكەن قالالاردىڭ كوشەلەرىندە ءتۇرلى اپاتتىق جاعداي تۋعىزىپ جۇرگەندىگى دە جاسىرىن ەمەس. سونداي-اق، جۋىردا استانا قالاسىنداعى بالاباقشالاردان شىعىپ، اتا-انالارىن كۇتىپ تۇرعان سابيلەردى بوتەن، سەنىمسىز كىسىلەردىڭ تاربيەشىلەردى الداپ، سۇراپ الىپ كەتۋگە ارەكەتتەنگەن فاكتىلەر ورىن العاندىعى دا الاڭدايتپاي قويمايدى»، –  دەيدى كارىباي مۇسىرمان. وسىعان وراي، سايلاۋشىلارمەن كەزدەسۋلەر بارىسىندا اتا-انالار دەپۋتاتتارعا شاعىمدانىپ، ەلدەگى مەملەكەتتىك بالاباقشالاردىڭ جۇمىس ۋاقىتىن كەشكى 19.00-گە دەيىن دەيىن ۇزارتۋعا نەمەسە كەزەكشى توپتار ۇيىمداستىرۋعا جاردەمدەسۋدى وتىنگەن.

«سونىمەن قاتار قازىرگى كەزدە مەكتەپكە دەيىنگى مەملەكەتتىك ۇيىمدار تاربيەشىلەرىنىڭ كەشكى ساعات 18.00-دەن كەيىن اتا-انالاردىڭ بالالارىن الىپ كەتكەنشە جۇمىس ىستەگەن ۋاقىتى ءۇشىن قوسىمشا ەڭبەك­اقى تولەنبەي وتىرعانى قولدانىستاعى ەڭبەك زاڭناماسىن بۇزۋشىلىق بولىپ تابىلادى. جوعارىدا ايتىلعان جاعدايلاردى ەسكەرە وتىرىپ، اتالعان وزەكتى ماسەلەنى رەسپۋبليكا كولەمىندە جان-جاقتى قاراستىرىپ، ونى وڭىنان شەشۋ قاجەت»، – دەپ ءتۇيدى ءسوزىن دەپۋتات.

«جۇمىس پەن بالاباقشا ورتاسىندا الاوكپە بوپ ءجۇرمىز»

حالىق قالاۋلىسى كەلتىرگەن ءۋاجدىڭ قاي-قايسىسى دا ورىندى. بۇعان بالالارىن تاڭسارىدە بالاباقشاعا اپارىپ، جۇمىستان شىعا سالا الىپ قايتۋعا اسىعاتىن اتا-انالارمەن تىلدەسكەننەن كەيىن كوزىمىز جەتتى. بالاباقشانىڭ جۇمىس  ۋاقىتىن ءبىر ساعاتقا ۇزارتۋ تۋرالى دەپۋتات ۇسىنىسىن قۋانا قۋاتتاعانداردىڭ ءبىرى – گۇلجان امانجولقىزى. 2 جاستان اسقان ۇلىن بيىلدان باستاپ الماتىداعى مەملەكەتتىك بالاباقشالاردىڭ بىرىنە بەرگەن كەلىنشەك كەشكە بالاسىن 18.00-دەن كەشىكپەي الىپ كەتۋ ءۇشىن جۇمىستان ەرتە سۇرانىپ شىعۋعا ءماجبۇر. «بالام ەكى ايدان بەرى ءۇيدىڭ ماڭىنداعى بالاباقشاعا بارىپ ءجۇر. كەزەكتى ۇزاق كۇتىپ، قولىمىز ارەڭ جەتكەن سوڭ، بالاباقشا ءتارتىبىن بۇزباي، ۋاقتىلى اپارىپ، ۋاقتىلى الىپ كەتۋگە تىرىسامىز. الايدا باسشىلىقتان «بالامدى الىپ كەتۋىم كەرەك ەدى» دەپ قاشانعى سۇرانا بەرەسىڭ؟ «بالاڭ بولسا، جۇمىستى قويىپ، ۇيدە وتىر» دەيدى عوي ءبىر كۇنى. جۇبايىم ۆاحتالىق قىزمەتتە، 15 كۇن جۇمىس ىستەپ، 15 كۇن دەمالادى. ول دەمالىستا بولعاندا، ۇلىمىزدى بالاباقشادان ءوزى الىپ كەتەدى. ال قالعان 15 كۇندە مەنىڭ ابدەن بەرەكەم كەتەدى، جۇمىس پەن بالاباقشا ورتاسىندا الاوكپە بولىپ جۇرەمىن. ساعاتقا ءبىر قاراپ، باستىقتىڭ ەسىگىنە ءبىر قاراپ، جۇمىستان ەرتەرەك شىعىپ كەتەتىن وڭتايلى ءساتتى كۇتۋمەن بولاسىڭ. شىعا سالىپ، بالاباقشاعا قاراي قۇستاي ۇشام. بالاڭمەن جۇمىسقا قايتا بارا الماسىڭ بەلگىلى، «باستىق ىزدەپ قالعان جوق پا ەكەن؟» دەگەن ءدۇدامال ويمەن ۇيگە قايتاسىڭ. بۇل ءالى باسى عانا عوي، ءارى قاراي وسىلاي جالعاسا بەرسە، كوپ ۇزاماي جۇمىسسىز قالامىن با دەپ قورقامىن»،– دەيدى گۇلجان.

جاس كەلىنشەك بالاسىن ءبىر-ەكى مارتە كەش العانى ءۇشىن تاربيەشىلەردەن ءسوز ەستىپتى. «ءبىر كۇنى بالاباقشاعا قاراي اسىعىپ كەلە جاتىپ قاپتالىمدا كەلە جاتقان كولىكتى cوعىپ كەتتىم. كولىك تىزگىنىندەگى ايەل يت تەرىمدى باسىما قاپتادى. ارينە، قىمبات كولىگىن سوقساڭ، كىم باسىڭنان سيپايدى؟ «پوليتسيا شاقىرماي-اق قويىڭىزشى، سوعىلعان جەرىن جوندەپ بەرەمىن. بارلىق شىعىنداردى ءوزىم تولەيمىن» دەپ جالىنىپ-جالبارىنىپ، ارەڭ كوندىردىم. جول بويىندا ءبىراز تۇرىپ قاپپىز، ساعات 7-دەن اسىپ كەتىپتى. كولىگىمە مىنە سالا، بالاما قاراي اسىقتىم. كەلسەم، تاربيەشى ۇلىمدى كيىندىرىپ، بالاباقشا قاقپاسىنىڭ جانىندا كۇتىپ تۇر ەكەن.  «وسى ۋاقىتقا دەيىن قايدا ءجۇرسىز؟ ءبىز دە ەرىگىپ جۇرگەن جوقپىز عوي، ۇيدە كۇتىپ وتىرعان بالا-شاعامىز بار. جۇمىس ۋاقىتىمنىڭ بىتكەنىنە 1،5 ساعات بولدى. سىزدەردى قاس قارايعانشا كۇتۋگە مىندەتتى ەمەسپىن. ەندى كەشىكسەڭىز، بالاڭىزدى كۇزەتشىمەن بىرگە قالدىرامىن دا، كەتە بەرەمىن. رەنجىمەڭىز!» دەدى اشۋلى تاربيەشى. ءوزىمنىڭ كىنامدى ءبىلىپ تۇرعاننان كەيىن قارسى ەشتەڭە دەي المادىم. كەشىرىم سۇراپ اقشا ۇسىنىپ ەدىم، المادى. باسشىلىق اتا-انالاردان اقشا الۋعا تىيىم سالعان ەكەن. ەگەر وزگە بالاباقشالارداعىداي كەزەكشى توپ قىزمەتى قاراستىرىلسا، قوسىمشا اقى تولەۋدەن قاشپاس ەدىك. نەمەسە كەشىكسەڭىز، ساعاتىنا وسىنشا تەڭگە تولەيسىز دەپ تاربيەشىلەرگە اقى تولەۋدى زاڭداستىرىپ قويسا، اتا-انالاردىڭ ءبارى قۋانار ەدى»، – دەيدى انا.

گۇلجاننىڭ ايتۋىنشا، قوسىمشا اقى الماعاننان كەيىن تاربيەشىلەر اتا-اناسى كەشىككەن بالالارعا جاۋاپكەرشىلىكپەن قارامايدى. اۋلاعا قاراۋسىز شىعارىپ جىبەرە سالاتىن جاعدايلار دا بولعان ەكەن. ۇلكەننىڭ قاراۋىنسىز جۇرگەن بالانىڭ جولعا شىعىپ، اداسىپ كەتپەسىنە، جۇيتكىگەن كولىكتەردىڭ استىنا تۇسپەسىنە كىم كەپىل؟ ماسەلەن،  بيىلعى جىلدىڭ مامىر ايىندا اقتاۋدا «تولقىن-2» شاعىن اۋدانىندا ورنالاسقان جەكەمەنشىك بالاباقشادا وقىس وقيعا بولدى. بالاباقشادان قىزدارىن الىپ كەتۋگە كەلگەن اتا-انا 2 جاسار ءياسميندى اۋلاداعى بالالاردىڭ اراسىنان تابا المايدى.

«ءبىز ساعات 18:20 شاماسىندا كەلدىك. اۋلادا بالالار ويناپ ءجۇردى. بىراق، اراسىندا ءبىزدىڭ قىزىمىز بولمادى. تاربيەشى  كىمگە كەلگەنىمىزدى سۇرادى. قىزىمىزدىڭ اتىن ايتىپ ەدىك، ونى الدەقاشان الىپ كەتكەنىن ايتتى. دۇربەلەڭگە سالىندىق. كۇيەۋىم ەكەۋمىز قىزىمىزدى ىزدەۋگە كىرىستىك. ارتىنشا جولدىڭ ارعى بەتىندە تاعى دا ءبىر بالاباقشا تۇرعانىن كوردىم. «بالكىم سول جاققا كەتكەن شىعار؟» دەگەن وي كەلدى»، – دەيدى رۋفيا حانىم. ياسمين راسىمەن دە، جولدىڭ قاراما-قارسى بەتىندە تۇرعان بالاباقشاعا كەتىپ قالعان ەكەن. كىشكەنتاي قىز سول جاقتاعى ويىن الاڭىنداعى ويىنشىقتارعا قىزىققان بولۋى كەرەك، قاقپادان شىعىپ، جولدىڭ ارعى بەتىنە ءوتىپ كەتكەن. ءياسميننىڭ اۋلادا جوق ەكەنىن ەشكىمنىڭ بايقاماعانى رۋفيا حانىمدى قاتتى اشۋلاندىرعان.

«تاربيەشى ارتىنشا كەشىرىم سۇراپ، ءوزىنىڭ قاتەلىگىن مويىندادى. 17:50 شاماسىندا ونىڭ باس كيىمىن كيگىزگەنىن ايتادى. ارتىنشا ونى كورمەگەندىكتەن اتا-اناسى الىپ كەتكەن بولار دەپ ويلاعان. ياعني قىز جارتى ساعات بويى بەيتانىس جەردە جۇرگەن. باستىسى، قىزىمىزدىڭ ءدىن امان ەكەنىنە قۋاندىق. كولىك قاعىپ كەتسە نەمەسە باسى اۋعان جاققا كەتىپ قالسا، نە بولار ەدى؟! ال قاراما-قارسى بەتتەگى بالاباقشا ارىپتەستەرىنىڭ قانداي ارەكەت جاسايتىنىن كۇتىپ وتىرعان ەكەن»، – دەيدى ءياسميننىڭ اناسى.

«تاربيەشىلەر جاپپاي جۇمىستان كەتۋى مۇمكىن»

18.00-دەن كەيىن تاربيەشىلەر بوساڭسىپ، بالالاردى قاراۋسىز قالدىرماس ءۇشىن بالاباقشالاردىڭ جۇمىس ۋاقىتىن 19.00-گە دەيىن ۇزارتۋدى اتا-انالاردىڭ بارلىعى دەرلىك قۇپتايدى. الايدا بۇعان بالاباقشا قىزمەتكەرلەرى قارسى. الماتىداعى «قۇلاگەر» ىقشاماۋدانىندا ورنالاسقان №162 بالاباقشانىڭ مەڭگەرۋشىسى جانار ومىربايقىزىنىڭ ايتۋىنشا، بالاباقشالاردىڭ جۇمىس ۋاقىتى ۇزارار بولسا، تاربيەشىلەر باسقا جۇمىس ىزدەپ كەتۋى مۇمكىن.

– اتا-انا رەتىندە دە، بالاباقشا مەڭگەرۋشىسى رەتىندە دە، مەكتەپكە دەيىنگى مەكەمەلەردىڭ جۇمىس ۋاقىتىن 19.00-گە دەيىن ۇزارتۋعا قارسىمىن. دەپۋتاتتىڭ بۇل ۇسىنىسى ەڭبەك كودەكسىنە قايشى. ەگەر جۇمىس ۋاقىتىمىز ءبىر ساعاتقا ۇزارار بولسا، بالاباقشالاردىڭ ءبارى تاربيەشىسىز قالا ما دەپ قورقامىن. ويتكەنى ءدال قازىرگى جالاقىمەن جۇكتەمەنى ارتتىرار بولسا، ولار باسقا جۇمىس ىزدەيتىنى انىق. نەسىن جاسىرايىق، تاربيەشىلەردىڭ جالاقىسى وتە تومەن. ەڭبەك ءوتىلى، تاجىريبەسى كوپ مامانداردىڭ ءوزى 63-65 مىڭ تەڭگەنى مىسە تۇتادى. ال ەڭبەك جولىن ەندى عانا باستاعان تاربيەشىلەردىڭ جالاقىسى 40 مىڭ تەڭگەدەن اسپايدى. مۇنداي جالاقىعا جان باعۋ وڭاي ما؟ قازىردىڭ وزىندە مامان قات. جۇكتەمە ارتار بولسا، جاعدايىمىز ءتىپتى قيىندايتىن سياقتى. قازىر تاربيەشىلەردىڭ قىزمەتى بالا تاربيەلەۋمەن شەكتەلمەيدى، تولتىراتىن قاعاز، وتكىزەتىن ەسەپ كوپ. ءبىزدىڭ بالاباقشادا ەڭبەك ءوتىلى 20 جىلدان اساتىن جالعىز تاجىريبەلى تاربيەشى بولعان ەدى. سول كىسى اتتەستاتتاۋدان ءوتىپ، جوعارى دەڭگەيلى مامان اتانسا، بالاباقشامىزدىڭ دا مارتەبەسى كوتەرىلەدى دەپ جۇرگەنبىز. وكىنىشكە قاراي، ول بالاباقشاداعى جۇمىستان باس تارتتى. قازىر ءبىر اۋقاتتى وتباسىندا بالا كۇتۋشىسى بولىپ قىزمەت ەتىپ ءجۇر. ايتۋىنشا، ايلىعى بالاباقشاداعى جالاقىدان 3 ەسە كوپ. ال جۇمىسى كەرىسىنشە، مۇنداعىدان جەڭىلدەۋ. مۇندا 20 بالاعا باس-كوز بولسا، وندا جالعىز بالاعا جاۋاپتى. وزگە بالاباقشاداعى ارىپتەستەرىم دە قاراماعىنداعى تاربيەشىلەردىڭ جەكە وتباسىلارعا جالدانۋى جيىلەگەنىن ايتادى. سوندىقتان ەگەر ۇكىمەت بالاباقشا ۋاقىتىن ۇزارتۋعا بەكىنسە، اۋەلى تاربيەشىلەردىڭ جالاقىسىن كوتەرۋ ماسەلەسىن شەشسە دەيمىز، – دەيدى بالاباقشا باسشىسى.

بالاباقشا تاربيەشىلەرىنىڭ جالاقىسى از ەكەنىن مينيسترلىكتەگىلەر دە مويىندايدى.  مەكتەپكە دەيىنگى مەكەمەلەر قىزمەتكەرلەرىنىڭ ايلىعىن كوتەرۋ ماسەلەسىن ءساۋىر ايىندا ماجىلىستە وتكەن دوڭگەلەك ۇستەلدە قازاقستاننىڭ ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا كوتەرگەن بولاتىن.

«مەكتەپكە دەيىنگى ۇيىمداردا 84 مىڭعا جۋىق پەداگوگ جۇمىس ىستەيدى. جىل سايىن وسى ماماندىققا مەملەكەتتىك تاپسىرىس كولەمى ۇلعايىپ كەلەدى. مەكتەپكە دەيىنگى ۇيىمداردا كادر تاپشىلىعىنىڭ باستى سەبەبى –  جالاقىلارىنىڭ از بولۋىندا. تاربيەشىلەر 35-55 مىڭ تەڭگە، ال تاربيەشىنىڭ كومەكشىسى 25-30 مىڭ تەڭگە جالاقى الادى. بۇل وتە از»، – دەدى ۆيتسە-مينيستر.       ونىڭ ايتۋىنشا، پەداگوگتاردىڭ جۇمىسىنا ساي جالاقى تولەۋ ءتيىمدى شەشىم بولادى. «سول سەبەپتى ءبىز تاعى دا جۇمىسشى توبىن قولداۋعا شاقىرامىز. مەكتەپ مۇعالىمدەرىنىڭ جۇمىس كولەمىن ازايتقانداي، وسى ماسەلەدە دە ءبىزدى قولداۋدى سۇرايمىز»، – دەدى سۋحانبەرديەۆا.

بۇعان دەيىن قر ءبىلىم جانە عىلىم ءمينيسترى ەرلان ساعاديەۆ قازاقستاندىق مۇعالىمدەردىڭ جالاقىنى كوتەرۋ تالابىنا وقۋ جۇكتەمەسىن ازايتۋ جوباسىن ۇسىنعان بولاتىن. كوپ ۇزاماي «مۇعالىمنىڭ ورتاشا جالاقىسى – 86 مىڭ تەڭگە، جوعارى ءبىلىمى بار جاس مۇعالىمنىڭ جالاقىسى – 49 مىڭ تەڭگە، ورتا ءبىلىمى بار مۇعالىمدەر 39 مىڭ تەڭگە الادى. بەس كۇندىك وقۋ اپتاسىنا وتكەننەن كەيىن، باستاۋىش سىنىپتاردىڭ وقۋ جۇكتەمەسى 13 ساعاتقا دەيىن قىسقاردى، بۇل ولاردىڭ جالاقىسىنا اسەر ەتتى»، – دەگەن ەدى الەۋمەتتىك-مادەني دامۋ جونىندەگى كوميتەتتىڭ توراعاسى گۇلنار يكسانوۆا.

ءبىر ماسەلەنى ىندەتسەڭ، ەكىنشىسىنە كەزىگەسىڭ. بالالاردىڭ قاۋىپسىزدىگىن قامتاماسىز ەتىپ، اتا-انالاردىڭ الاڭ كوڭىلىن جايلاندىرۋ ءۇشىن بالاباقشانىڭ ءتۇيىنى تارقاتىلماعان تۇيتكىلدەرىن رەتتەۋ كەرەك. سوندا اربا دا سىنبايدى، وگىز دە ولمەيدى.

 

ايمان اسقاربەكقىزى، اتا-انا:

–  3 جاسار قىزىمنىڭ بالاباقشاعا بارىپ جۇرگەنىنە 1 جىلدان استى. وسى ۋاقىت ارالىعىندا ونى الىپ كەتۋگە ۋاقتىلى بارعان كەزىم جوق. ويتكەنى بالاباقشا مەن جۇمىستىڭ ارالىعى – 1 ساعاتتىق جول. كەپتەلىسكە تاپ بولساڭ، ودان دا ۇزاق. ءبىز كەلگەنشە بالالارىمىزعا جاۋاپكەرشىلىكپەن قاراسىن دەپ، اتا-انالار كەزەكشى توپقا قوسىمشا اقى تولەيمىز. بارلىعى زاڭدى تۇردە، بانك ارقىلى ايىنا 1500 تەڭگە تولەپ، تۇبىرتەگىن وتكىزەمىز. كەزەكشى توپتىڭ اشىلعانىنا كوپ بولعان جوق. وعان دەيىن جۇمىستان كۇندە سۇرانىپ، باسشىلىقتىڭ الدىندا ابىرويسىز بولىپ جۇردىك. قازىر تىنىسىمىز كەڭىپ قالدى. 19.30-عا دەيىن الاڭسىز جۇرۋگە بولادى. ودان كەشىكسەك، تاربيەشىلەرگە العىس رەتىندە 300-500 تەڭگە ۇستاتامىز. ول دا ادام عوي، ۇيىندە كۇتىپ وتىرعانى وتباسى بار. رەنجىمەي، بالامىزعا دۇرىس قاراسا ەكەن دەيمىز. دەپۋتاتتار بالاباقشا ۋاقىتىن ءبىر ساعاتقا ۇزارتۋدى ۇسىنىپتى دەپ ەستىپ جاتىرمىز. ولاي بولسا، ءتىپتى جاقسى بولار ەدى.

 

قارلىعاش بالابەكوۆا، بالاباقشا تاربيەشىسى:

– بالاباقشادا قىزمەت ەتىپ جۇرگەنىمە 7 جىلدىڭ ءجۇزى بولدى. تالاي اتا-انامەن جۇمىس ىستەسىپ، تالاي بالانى تاربيەلەدىك. بالالاردى جاقسى كورگەندىكتەن بولار، ايلىقتىڭ ازدىعىنا قاراماي، باسقا جۇمىسقا اۋىسقىم كەلمەيدى. سابيلەردىڭ ورتاسىندا جۇرسەڭ، ۋاقىتتىڭ قالاي جىلدام ءوتىپ كەتكەنىن بايقاماي قالاسىڭ. بىلدىرلاعان تىلدەرى دە، وزدەرى دە ءتاتتى. الايدا جۇمىسىمىز اسقان جاۋاپكەرشىلىكتى، تەمىردەي توزىمدىلىكتى تالاپ ەتەدى. باسقا سالا قىزمەتكەرلەرىندەي ساعات تۇپ-تۋرا 18.00-دە جۇمىس ۋاقىتىم اياقتالدى دەپ، جۇمىستان كەتىپ قالۋ جوق. بالالاردىڭ ءبارىن اتا-انالارى الىپ كەتكەنشە كۇتىپ وتىراسىڭ. اتا-انانىڭ دا ءتۇر-ءتۇرى بار. وزدەرى ۋاقتىلى كەلمەگەنىمەن قويماي، رەنىش بىلدىرسەڭ، اۋزىنا تۇسكەنىن ايتىپ كەتەدى.

ءبىر جولى كىشى بالام استان ۋلانىپ، قاتتى اۋىرىپ قالدى. ودان ءسال ەرەسەكتەۋ قىزىم قايتا-قايتا تەلەفون سوعىپ، «ماما، تەز كەلشى. ارنۇر دەمالا الماي جاتىر» دەپ جىلايدى. زارە-قۇتىم قالمادى. قاس قارايىپ كەتكەن. جۇمىستان كەتىپ قالايىن دەسەم، ءۇش-ءتورت بالانىڭ اتا-اناسى ءالى كەلمەگەن. كۇتىپ وتىرمىز. ءبىر كەزدە شىداي الماي، بالالاردى كۇزەتشىگە تابىستادىم دا، ۇيگە قاراي ۇشتىم. جەدەل جاردەم شاقىرىپ، بالامنىڭ بەتىن بەرى قاراتتىق. ەرتەڭىنە جۇمىسقا كەلسەم، باستىق تۇسىنىكتەمە جاز دەيدى. اتا-انالاردىڭ ءبىرى بالام قاراۋسىز ءجۇردى دەپ ۇستىمنەن شاعىمدانىپتى. ءبىرىنشى جولى قاتاڭ سوگىس الدىم، ەكىنشى رەت قايتالانسا جۇمىستان شىعاتىنىمدى ەسكەرتتى. سودان كەيىن سوڭعى بالانى الىپ كەتكەنشە جۇمىستان كەتكەن ەمەسپىن.

ۇقساس جاڭالىقتار

Back to top button