عالىم جۇماعالي ىسماعۇلوۆ تۇرعان ۇيگە ەسكەرتكىش تاقتا اشىلدى

الماتى قالاسىندا كورنەكتى قوعام قايراتكەرى، جازۋشى، اۋدارماشى، مەملەكەتتىك سىيلىقتىڭ لاۋرەاتى جۇماعالي ىسماعۇلوۆتىڭ قۇرمەتىنە عالىمنىڭ ءوزى تۇرعان ۇيگە ەسكەرتكىش تاقتا ورناتىلدى، دەپ حابارلايدى قازاقپارات ءتىلشىسى. 

ادەبيەتتانۋشى عالىم، فيلولوگيا عىلىمدارىنىڭ دوكتورى، پروفەسسور، «مىرجاقىپتانۋشى» جۇماعالي ىسماعۇلوۆ 1928 جىلى 17 ساۋىردە قوستاناي وبلىسى سارىكول اۋدانى، سونالى اۋىلىندا دۇنيەگە كەلگەن. سول كەزدەگى س.كيروۆ اتىنداعى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن تامامداعان. جۇماعلي ىسماعۇلوۆتىڭ شاكىرتى، فيلولوگيا عىلىمدارىنىڭ كانديداتى بازاربەك اتىعاي عالىمنىڭ 1986 جىلعى ەرلىگى تۋرالى ايتىپ بەردى. «جۇماعالي ىسماعۇلوۆ قازىرگى «قازاقپارات»، بۇرىنعى «كازتاگ-تىڭ» ديرەكتورى بولدى ۇزاق جىلدار. ول كىسىنىڭ ءبىر ەرلىگى بار: 1986 جىلى الاڭداعى سۋرەتتەردى قورىقپاي جاريالاعان ەدى. سول ءۇشىن قىزمەتىنەن دە قۋىلعان. اۋدارما سالاسىن جانر رەتىندە دامىتتى. كوركەم اۋدارما تاريحىنداعى ەڭ شەبەر اۋدارمالاردى جاسادى. ورىس، شەتەل كلاسسيكتەرىن قازاقشا سويلەتتى. ول – «ابايتانۋ» سالاسىندا تەڭدەسسىز ەڭبەك ەتكەن ادام. سونىمەن قاتار، الاش ارداگەرلەرى اقتالعان 1988 جىلداردان كەيىن ا.بايتۇرسىنوۆ پەن م.دۋلات ۇلىنىڭ ەڭبەكتەرىن جيناقتاپ، ءبىزدىڭ تاريحىمىزدان الاتىن ورنىن ناقتىلاعان عالىمداردىڭ ءبىرى»، – دەدى بازاربەك اتىعاي. جۇماعالي ىسماعۇلوۆا 2005 جىلى «قۇرمەت»، «حالىق دوستىعى» وردەندەرىمەن ماراپاتتالعان. «ادام مەرەيى»، «20-30 جىلدارداعى قازاق ادەبيەتى»، «مارجان مەن ماحاببات»، «ادام مەرەيى» سىندى ادەبي تۋىندىلاردىڭ 40-تان استام عىلىمي ەڭبەكتىڭ اۆتورى. ەسكەرتكىش تاقتانىڭ اشىلۋىنا عالىمنىڭ اعايىن-تۋىستارى مەن الماتى مەن استانانىڭ زيالى قاۋىم وكىلدەرى جينالدى. ەسكەرتكىش تاقتا الماتى قالاسى اكىمىنىڭ 19 شىلدەدەگى قاۋلىسى بويىنشا جۇزەگە اسقان.

Back to top button