جۇقپالى اۋرۋلاردى ەمدەيتىن دارىگەرلەردىڭ جالاقىسى كوتەرىلۋى مۇمكىن

استانادا جۇقپالى اۋرۋلاردى ەمدەۋ جانە ونىڭ الدىن الۋ تاقىرىبىندا وتكەن دارىگەرلەردىڭ عىلىمي-تاجىريبەلىك كونفەرەنتسياسى باستالدى. ەكى كۇنگە سوزىلاتىن اق حالاتتىلاردىڭ جيىنىنا گەرمانيا، اقش، يزرايل، رەسەي، ۋكراينا، وزبەكستان، قىرعىزستان ەلدەرىنىڭ جۇقپالى اۋرۋلاردى ەمدەيتىن ماماندارى كەلىپ، عىلىمي تۇرعىدا تاجىريبە الماسپاق، دەپ حابارلايدى قازاقپارات.

ينفەكتسيالىق اۋرۋلاردىڭ مەنەدجمەنتى بويىنشا وتكەن ءباسپاسوز ءماسليحاتىندا جۇقپالى اۋرۋلاردىڭ ەمدەيتىن دارىگەر باقىت كوشەروۆا ەلىمىزدە ينفەكتسيا سالاسىنداعى اق حالاتتىلارعا پسيحيكالىق جانە ەموتسيالىق تۇرعىدا قىسىمنىڭ كوپ تۇسەتىنىن، وسىعان قاراماستان ايلىقتارى تومەن بولاتىنىن، سونىمەن بىرگە ولاردى سىرقات جۇقتىرۋ قاۋپى جوعارى ەكەنىن اتاپ ءوتتى. وسى سەبەپتى، باقىت كوشەروۆا اتالعان سالاداعى دارىگەرلەردىڭ جۇمىس بارىسىنىڭ قاۋىپتىلىگىنە بايلانىستى ايلىقتارىن قايتا قاراۋدى ۇسىندى.

سونداي-اق ول بۇل سالاداعى كادرلاردىڭ جەتىسپەۋشىلىگىن دە اتاپ ءوتتى. ونىڭ ايتۋىنشا، اۋىلدىق ەلدى مەكەندەردە جانە مەديتسينالىق-سانيتارلىق قىزمەت سالاسىندا ماماندار جەتىسپەيتىن كورىنەدى. وسىعان بايلانىستى ب.كوشەروۆا ينفەكتسيا سالاسىنداعى دارىگەرلەردى قايتا دايارلاۋ مۇمكىندىگىن قاراستىرۋ كەرەكتىگىن جەتكىزدى. ءوز كەزەگىندە ءسوز العان قر دەنساۋلىق ساقتاۋ ۆيتسە-ءمينيسترى ءلاززات اقتاەۆا ەلىمىزدە شارۋاشىلىقتى باسقارۋ قۇقىعى بار كوپ بەيىندى ستاتسيونارلار ەنگىزىلىپ جاتقانى تۋرالى ايتتى.  دەمەك، ءبىرىنشى جەتەكشىلەر ەڭبەكاقى قورىن وزدەرى باسقارىپ، قول استىنداعى قىزمەتكەرلەردىڭ ايلىعىن ءوز ەركىمەن وسىرە الادى.

سونىمەن قاتار، اكىمشىلىك -باسقارۋ رەسۋرسىن قىسقارتۋ ارقىلى كەتەتىن شىعىن قىسقارتۋعا بولاتىنىن ءمالىم ەتتى. «سىزدەردىڭ بۇل سۇراققا تالقىلانۋى بارىسىندا باسا ماڭىز بەرگەندەرىڭىز ءجون. تەك مەديتسينالىق ۇيىمدار بىزگە ناقتى شىعىندارىن كورسەتىپ بەرگەنى ابزال»، – دەديى ۆيتسە-مينيستر.

ءلاززات اقتاەۆا سونىمەن بىرگە، كادرلاردىڭ جەتىسپەۋشىلىگى تۋراسىنداعى ماسەلەگە جاۋاپ بەردى. «سىزدەر بۇرىن بۇل ۇسىنىستى جولداماعاندىقتان، بيىل اتالعان ماسەلەگە قاتىستى نە تىندىرۋعا بولاتىنىن قاراستىرىپ كورەيىن. ءبىز ايماقتارداعى كادرلاردىڭ جەتىسپەۋشىلىگىن ساراپتاپ كوردىك.  اۋىلدىق ەلدى مەكەندەردىڭ دەنساۋلىق سالاسىنداعى كادرلىق الەۋەتىن ارتتىرۋ ءۇشىن جوو-نىڭ 7 كۋرسىنان كەيىنگى ءبىلىم-بىلىك جەتىپ جاتىر. بۇعان قوسا بەلگىلى ءبىر مامانداردى قايتا دايارلاۋعا مۇمكىندىك بەردىك. ينفەكتسيا سالاسىنداعى دارىگەرلەر راسىندا اۋىلداردا جوق.ماسەلەنى بىرگە تالقىلاپ كورەيىك»، – دەپ ءتۇيدى اقتاەۆا.

 

ۇقساس جاڭالىقتار

Back to top button