ەردوعان كۇللى مۇسىلمانداردى روحيندجا حالقىنا اراشا تۇسۋگە شاقىردى

بۇگىن استانادا ءوتىپ جاتقان يسلام ىنتىماقتاستىعى ۇيىمنىڭ عىلىم جانە تەحنولوگيالار جونىندەگى ءبىرىنشى سامميتىندە تۇركيا پرەزيدەنتى رەدجەپ تايىپ ەردوعان بارشى مۇسىلمان مەملەكەتتەرىن ميانماداعى “ادامزات دراماسىن” شەشۋگە شاقىردى. بۇل تۋرالى قازاقپارات حابارلايدى.

“ميانماداعى باۋىرلارىمىز قيىن جاعدايعا تاپ بولىپ وتىر. ولار ءوز ۇيلەرىن تاستاپ قاشۋعا ءماجبۇر بولدى. ءبىز وسى ءبىر ادىلەتسىزدىكتى بىرگە توقتاتۋىمىز قاجەت. بانگلادەش پەن ميانما ۇكىمەتتەرىمەن كەلىسە وتىرىپ، ول جەردەگى “ادامزات دراماسىن” رەتتەۋگە كومەكتەسۋىمىز كەرەك. سەبەبى، بانگلادەشكە قاشىپ بارعان مۇسىلماندار دا كومەككە ءزارۋ. ءبىز ولارعا كومەكتەسۋگە دايىن ەكەنىمىزدى جەتكىزدىك. ەندى، بارلىق مۇسىلمان مەملەكەتتەرى بىرىگىپ، ول جاقتاعى باۋىرلارىمىزعا قول ۇشىن سوزايىق”، – دەدى ەردوعان.

مۇنىمەن قاتار، تۇركيا باسشىسى مۇسىلماندار اراسىنداعى ساۋاتسىزدىق جويۋ ماسەلەسىن دە كوتەردى. سەبەبى بۇگىندە الەم بويىنشا مۇسىلمانداردىڭ جارتىسى بوتەن اعىمنىڭ جەتەگىندە ءجۇر.  يسلام ىنتىماقتاستىعى ۇيىمى – 1969 جىلى 25 قىركۇيەكتە مۇسىلمان مەملەكەتتەرى باسشىلارىنىڭ   راباتتا وتكەن كونفەرەنتسياسىندا نەگىزى قالانعان ەڭ ءىرى جانە ىقپالدى ۇكىمەتتىك ءارى حالىقارالىق مۇسىلمان ۇيىمى. قازىرگى ۋاقىتتا ول جالپى سانى شامامەن 1،5 ميلليارد ادامدى قامتيتىن 57 ەلدىڭ باسىن بىرىكتىرىپ وتىر.

ۇقساس جاڭالىقتار

Back to top button