Альварес: Головкинді нокаутпен жеңемін

Мексикалық боксшы Сауль "Канело" Альварес алдағы жекпе-жекте Геннадий Головкинді нокаутпен жеңуді көздейді, деп xабарлайды ҚазАқпарат тілшісі. "Әлбетте, мен жеңіске жетуді көздеймін. Біздің жекпе-жегіміз 12 раундқа дейін созылады, я болмаса, төрешілер шешімімен аяқталады деп айта алмаймын. Сөз жоқ, ол жекпе-жек нокаутпен аяқталады. Себебі екеуіміз де мықты панчерміз. Ал ондай жекпе-жекте міндетті түрде нокаут болады", - дейді Альварес. Бүгінде бокс саласындағы кейбір сарапшылар Головкин-Альварес жекпе-жегі 12 раундқа дейін созылса, жеңісті мексикалық боксшыға беріп қоюы әбден мүмкін деп отыр. Себебі бұған дейін "Канело" бірнеше қарсыласын төрешілер шешімімен жеңгенде, бокс жанкүйерлері де, сарапшылары да онымен келіспей қойған. Осыған байланысты Геннадий Головкинге нокаутпен жеңуге кеңес беріп жатыр. GGG-дің өзі де ол жекпе-жекті нокаутпен аяқтауды көздейді. Айта кетейік, Головкин-Альварес жекпе-жегі 16 қыркүйекте АҚШ-тың Лас-Вегас қаласында өтеді. Қазірдің өзінде барлық билеттер сатылып кеткен. Уақыт айырмашылығына байланысты аталған жекпе-жек Қазақстанда 17 қыркүйек күні таңертең көрсетіледі.