Еліміздің бірнеше өңірінде 17–19 шілде аралығында "Қауіпсіз үй" жедел-профилактикалық іс-шарасы өткізілді. Іс-шара аясында тұрмыстық зорлық-зомбылықтың алдын алу, қиын жағдайдағы отбасыларды анықтау және оларға жан-жақты қолдау көрсету бағытында кешенді жұмыстар жүргізілді, деп хабарлайды turkystan.kz.
Үй – әр адам өзін қауіпсіз сезінетін, мейірім мен махаббатқа толы мекен болуы тиіс. Егер шаңырақта қорқыныш пен зорлық болса, бұл бір отбасының ғана емес, бүкіл қоғамның мәселесі.
Бүгінде мемлекет тұрмыстық зорлық-зомбылықтың алдын алу жұмыстарын күшейтіп, заңнаманы жетілдіруде, дағдарыс орталықтары мен қолдау қызметтерінің жұмысын дамытуда. Бірақ ешбір заң адамдардың бір-біріне деген құрметі мен жанашуын, отбасы құндылықтарын алмастыра алмайды.
Осыған байланысты Ішкі істер министрлігі Астана, Шымкент қалаларында, Ақмола, Алматы, Түркістан және Жетісу облыстарында 17–19 шілде аралығында "Қауіпсіз үй" жедел-профилактикалық іс-шарасын өткізді.
Іс-шараға білім беру, денсаулық сақтау, әлеуметтік қорғау саласының мамандары және қоғам өкілдері қатысты. ЖПІШ барысында қиын жағдайға тап болған 20 отбасы анықталып, олармен уәкілетті мемлекеттік органдар жұмыс жүргізіп жатыр.
Зорлық-зомбылыққа ешқашан ақтау жоқ. Әрбір әйел қорғануға, әрбір бала бақытты балалық шақта өмір сүруге құқылы. Ең қауіптісі – үнсіз қалу. Сондықтан бейжай қарамайық. Бір ауыз қолдау, дер кезінде көрсетілген көмек бір адамның тағдырын өзгерте алады. Өйткені қауіпсіз отбасы – берекелі қоғамның негізі.
Еске сала кетейік, «Заң мен тәртіп» қағидаты — Қазақстанда Президент Қасым-Жомарт Тоқаевтың бастамасымен мемлекеттік саясаттың маңызды бағыты ретінде жүзеге асырылып жатқан, заңның үстемдігін және қоғамдық тәртіпті қамтамасыз етуге бағытталған қағидат.
