Қазақстанның сыртқы істер министрлігі Ресейдің Ленинград облысында жаппай төбелеске қатысқан қазақстандықтар туралы мәліметпен бөлісті, деп хабарлайды turkystan.kz.
Еске салайық, 2026 жылдың 26 наурызында Ленинград облысының Усть-Луга вахталық кентінде төбелес шыққан. Оған қатысқандар арасында Қазақстан азаматтары да болды.
"Оқиғаның мән-жайын жан-жақты және объективті түрде анықтау мақсатында Ресей Федерациясының құқық қорғау органдары тиісті процестік іс-шараларды жүзеге асырды, оның ішінде жанжалға қатысушыларды қамауға алды", - деді СІМ ресми өкілі Ерлан Жетібаев.
Қазіргі уақытта тергеу шаралары жалғасып жатыр.
"Қолда бар мәліметтерге сәйкес, Қазақстан азаматтары арасында ауыр жарақат алған немесе ауруханаға жатқызуды қажет ететін адамдар жоқ. Оқиға орнындағы жағдай тұрақты және құзыретті қызметтердің бақылауында", - деді СІМ өкілі.
Ол Қазақстан Республикасының Санкт-Петербург қаласындағы Бас консулдығының қызметкерлері Ресей Федерациясының құқық қорғау органдарының өкілдерімен тұрақты байланыста екенін жеткізді.
Сонымен қатар Қазақстан Бас консулы азаматтарымызға қажетті консулдық-құқықтық көмек көрсету және барлық мән-жайды нақтылау үшін оқиға орнына барған.
