Банан пісу барысында тек түсі мен дәмін емес, құрамын да өзгертеді. Әр кезеңде ондағы қант, крахмал және витаминдердің мөлшері өзгеріп отырады. Сол себепті жылдам энергия керек болғанда немесе керісінше қант деңгейін тұрақты ұстайтын тағам іздегенде, дұрыс банан таңдаудың маңызы бар. Диетологтар әр жағдайға қай түрі қолайлы екенін түсіндірді, деп хабарлайды turkystan.kz.
Жасыл (толық піспеген) банандар жасыл, қатты және қабығы қиын тазартылады. Диетолог Эйвери Зенкердің айтуынша, бұл кезеңде бананда қант өте аз, ал резистентті крахмал көп болады. Ол пребиотик сияқты әсер етіп, ішек бактерияларын қоректендіреді, қант деңгейін тұрақтандырады және ұзаққа созылатын тоқтық сезімін береді.
Бұл түрі диабет немесе предиабет кезінде, сондай-ақ ас қорыту жүйесін жақсартқысы келетіндерге пайдалы. Бірақ спортпен шұғылданатындар үшін ауырлық тудыруы мүмкін.
Жартылай піскен бананның қабығы сары, бірақ ұштарында аздап жасыл бөлігі бар. Дәмі жұмсара бастағанымен, әлі де тығыз. Бұл кезеңде крахмал біртіндеп қантқа айнала бастайды, бірақ талшық көлемі әлі де жоғары. Калий мен магнийге бай, жеңіл тіске басарға жақсы нұсқа.
Диетолог мұндай банандарды жасыл бананның дәмін ұнатпайтын, бірақ ас қорытуға көңіл бөлетін адамдарға ұсынады. Сондай-ақ пери- және постменопауза кезеңіндегі әйелдерге ішек саулығын қолдау және инсулинге сезімталдықты жақсарту үшін тиімді.
Толық піскен банан толықтай сары, жұмсақ, тәтті және оңай тазарады. Бұл кезеңде крахмал табиғи қантқа айналады, талшық азаяды, бірақ антиоксиданттар мен минералдардың деңгейі шегіне жетеді. Бір банан күніне қажетті калий мен магнийдің шамамен 8% мөлшерін береді. Бұл – жаттығу алдындағы жылдам энергияға, балаларға және жүрек-қантамыр саулығын қолдағысы келетіндерге тамаша таңдау.
Қатты піскен бананның қабығында қоңыр дақтар пайда болады, дәмі мен иісі бай, өзі жұмсақ. Қант мөлшері ең жоғары деңгейге жақындайды, ал талшық одан әрі азаяды. Жеңіл сіңетін энергия ретінде пайдалы, әсіресе ас қорытуы сезімтал адамдарға. Алайда глюкозасын бақылайтындар сақ болғаны жөн.
Шіри бастаған бананның қабығы қоңыр не қара, өзі өте жұмсақ болады. Қант пен антиоксидант ең көп, ал талшық пен С витамині азаяды. Мысалы, піскен бананда 14 мг С витамині болса, мұндай бананда 10 мг болады.
Мұндай банан смузи мен түрлі тәтті-дәмді пісіруге өте қолайлы: табиғи тәттілігі жоғары болғандықтан, қосымша қантты аз қажет етеді.
Диетолог Аманда Сауседаның айтуынша, «дұрыс» немесе «дұрыс емес» банан жоқ. Әр кезеңнің өз артықшылығы бар. Ағзаңызға дәл қазір не қажет, соған қарай таңдаған дұрыс.
