Павлодар облысында «Богатырь» көмір разрезінің аумағында бір жұмысшы қаза тапты. Кәсіпорынның мәліметінше, оқиға 22 қарашада болған, деп хабарлайды turkystan.kz.
«Өндірістік жұмыстарды орындау кезінде өлімге әкелген жазатайым жағдай болды», – делінген полиция хабарламасында.
Оқиға орнында арнайы комиссия құрылды, ол жағдайдың мән-жайын анықтап жатыр. Сонымен бірге еңбек қауіпсіздігі ережелерін бұзу фактісі бойынша полиция сотқа дейінгі тергеуді бастады.
«Алдын ала анықталғандай, экскаваторды ауыстырып қосу пунктіне қосу барысында марқұм өмірге сәйкес келмейтін жарақаттар алған. Оқиғаның мән-жайы мен себептері тергеу барысында белгілі болады», – деп атап өтті полиция.
«Богатырь Көмір» ЖШС қайтыс болған адамның отбасына барлық қажетті көмекті көрсететінін хабарлады.
«Богатырь Көмір» – еліміздегі ең ірі разрездердің бірі, ол Қазақстанның энергетикалық кәсіпорындарын көмірмен қамтамасыз етеді.
