Ақтөбе облысында барлығы 12 проблемалы үлестік құрылыс нысаны анықталған. Олар бойынша 797 жәбірленуші бар, жалпы келтірілген залал көлемі 6,1 млрд теңгені құрайды, деп хабарлайды turkystan.kz.
Мысалы, «АлашОрда-1» ТҚК және «Aviator Premium» ТК құрылыс салушылары алаяқтық жолмен 200-ден астам үлескердің қаражатын тартып, 1,8 млрд теңгеден астам сомада зиян келтірген.
Облыс прокуратурасының қабылдаған шаралары нәтижесінде биылғы жылы 7 құрылыс компаниясының басшылары 11 нысан бойынша қылмыстық жауаптылыққа тартылды.
Мәселен, сот үкімімен «Safina.kz» ТҚК және «СтройСервисРегион» ТК құрылыс салушылары 300-ден астам үлескердің ақшасын алаяқтық жолмен иемденгені үшін 10 жылға бас бостандығынан айырылды.
Прокуратура органдары азаматтық тәртіпте 413 үлескердің мүддесінде 8 талап-арыз беріп, тұрғын үй сату-сатып алу шарттарын жарамсыз деп тану және мүлікті қайтару туралы талап қойған.
6 талап-арыз бойынша 285 үлескердің мүддесі қорғалды, ал 3 нысан бойынша 128 үлескердің істері сот қарауында.
Прокуратура тұрақты негізде тұрғын үй құрылысы кезінде халықтың қаражатын заңсыз тарту фактілерін анықтау бойынша мониторинг жүргізеді.
