Қазақстан халқының саны 2025 жылғы 1 шілдеде 20,38 млн адамға жетті. Қалаларда 12,89 млн адам, ауылдық жерлерде — 7,48 млн адам тұрады. Жарты жылдағы жалпы өсім 104,4 мың адамды құрады, деп хабарлайды turkystan.kz.
Бұл туралы Ұлттық статистика бюросы мәлімдеді.
Қаңтар-маусым айларында 161,2 мың бала дүниеге келіп, 64,6 мың адам қайтыс болды. Табиғи өсім 96,7 мың адамды құрады. Ең жоғары туу көрсеткіші Түркістан облысында (1000 адамға шаққанда 21,94), Маңғыстау облысында (20,98) және Шымкентте (20,63) тіркелді.
Ең жоғары өлім-жітім Солтүстік Қазақстан облысында (1000 адамға шаққанда 11,67), Шығыс Қазақстан облысында (11,27) және Қарағанды облысында (9,33) байқалды, бұл халықтың жас құрылымына байланысты. Жарты жылда елде 51,4 мың неке мен 21,5 мың ажырасу тіркелді.
Миграциялық өсім 7749 адамды құрады. Қазақстанға 11 267 адам келіп, 3518 адам кетті, бұл 2024 жылдың осы кезеңімен салыстырғанда 49,5%-ға аз. Негізгі көші-қон алмасуы ТМД елдерімен жүреді. Ең көп өсім өңіраралық көші-қон есебінен Астанада (36 821 адам), Алматыда (16 934), Шымкентте (10 838) және Алматы облысында (5500) тіркелді.
Бұған дейін 2025 жылдың алғашқы айларының қорытындысы бойынша Түркістан облысы табиғи өсім бойынша көшбасшы болғаны хабарланған — 15 372 адам. Алайда, аймақтан 18 421 адам көшіп кеткен, бұл елдегі ең жоғары көші-қон шығыны болды. Ішкі көші-қонның негізгі бағыты — Астана, онда өсім шамамен 30 мың адамды құрады.
