2025 жылғы 1 шілдедегі жағдай бойынша Қазақстанда жұмыс берушілердің қызметкерлерге 882 миллион теңге жалақы берешегі бар, деп хабарлайды turkystan.kz.
Жалақы бойынша берешек 92 кәсіпорында анықталды. Бұған қоса, шілде айының басында ел бойынша еңбек құқықтарының 3600 бұзушылығы тіркелді.
Құқық бұзушылықтарға жол берген кәсіпорындардың басшыларына 1951 міндетті ұйғарым беріліп, олар жалпы сомасы 233 миллион теңге айыппұл төлеуге міндеттелді. Тиісті мемлекеттік органдардың араласуы мен жалақы берешектерін өтеу бойынша қатаң кестелер белгілеу нәтижесінде 2000 қызметкерге 755 миллион теңге төленді.
Еңбек құқықтарын бұзудың басым бөлігі тікелей еңбек саласында тіркелді. Еңбек қауіпсіздігі мен еңбекті қорғау саласында 616 бұзушылық анықталды, ал жұмыспен қамту саласында шамамен жиырма жағдай тіркелген. Мемлекеттік органдар қабылдаған шаралар жалпы саны 21 мың қызметкердің құқығын қорғауға мүмкіндік берді.
