Димаштың 31 жасқа толуына орай Dears DiVoices хоры құттықтау ретінде қазақтың «Daididau» әнін жазды. Хорда Польша мен Жапониядан келген әртістің жанкүйерлері бар, деп хабарлады turkystan.kz.
«Daididau» – DiVoices хорымен орындалған Димаштың репертуарындағы алтыншы ән. Олар бұған дейін «Mahabbat ber magan», «Marigolds», «Ikanaide», «Autumn Strong» және «Unforgettable Day» композицияларының нұсқаларын ұсынған болатын. Төрт дауысты хорға арналған барлық әндердің аранжировкаларын пианист Ольга Попова дайындады.
«Димаш – қазақ мәдениетінің әлемдегі ең үздік елшісі. Қазақстанның тілі мен мәдениеті ол үшін қаншалықты маңызды екенін білеміз. Біз әнді әншінің ана тілінде орындай отырып, осындай ұлы әртіс пен мейірімді адамды тәрбиелеген қазақ халқына құрмет көрсеткіміз келді», – дейді Димаштың поляк фан-клубының әкімшісі Тереза Какол.
Хордың қойылымдарын Димаштың поляк фан-клубының YouTube арнасынан тыңдауға болады.
