Мемлекеттік рәміздер күніне орай «AMANAT» партиясының «Жастар Рухы» жастар қанатының белсенділері Kazakhstan Speedcubing Federation командасымен бірлесіп Астанада ерекше патриоттық акция өткізді.
Олар Елордадағы Нұржол бульварында үш мыңнан астам Рубик текшелерінен Мемлекеттік Елтаңба бейнесін жасады.
«Жастар Рухы» жастар қанатының төрағасы Ақерке Искандерованың айтуынша, мұндай креативті акциялар отандастарымыздың елге деген мақтаныш сезімін ояту, мемлекеттік рәміздерге деген құрметін нығайту және белсенді азаматтық ұстаным қалыптастыру мақсатында өткізіледі.
«Мемлекеттік Елтаңбаның мән-мағынасы тереңде жатыр. Онда халқымыздың ғасырлар бойғы тарлан тарихы көрініс тапқан. Шаңырақ – бейбітшілік пен келісімді, тұлпар – қуат-күш пен еркіндікті, ал бес бұрышты жұлдыз – болашаққа деген көзқарасымызды бейнелейді. Біз қалыптан тыс тәсілдер арқылы патриотизм құндылықтарын насихаттауға тырысамыз. Жастарымыз Мемлекеттік рәміздермен рухани байланыс барын сезініп, оларды мақтан тұтса екен дейміз. Осындай акциялар азаматтардың Отанға деген сүйіспеншілігін, ел ертеңіне деген жауапкершілік сезімін оятады», – деді ол.
Көлемі 4x3 метрлік панноны құрастыруға үзіліссіз 10 сағат уақыт жұмсалды. Әр текше алдын-ала тексеріліп, түс алгоритміне сәйкес таңдалды. Нәтижесінде Тәуелсіз Қазақстанның символына айналған Елтаңбаның дәлме-дәл, пиксельді бейнесі әзірленді. Спидкубинг чемпионы және Kazakhstan Speedcubing Federation ұйымының жетекшісі Әлихан Ертұрсынның айтуынша, мұндай жобалар аса жоғары зейін мен команданың үйлесімді жұмыс істеуін талап етеді.
«Эскиз жасау жұмысын алдын ала бастадық: арнайы компьютерлік бағдарламаның көмегімен Елтаңбаның пиксельді үлгісін әзірлеп, оны бөліктерге бөлдік. Мұндай ауқымды дүниені құрастыру жұмысы – аса жоғары жауапкершілік. Алайда бұл біздің алғашқы тәжірибеміз емес. Елорда тұрғындары мен қонақтарына ерекше әрі әсерлі туынды сыйлай алғанымызды мақтан тұтамыз. Жалпы, Рубик текшесі – ақыл-ойды, моториканы, қимыл-қозғалысты үйлестіруге және барынша зейінді болуға арналған таптырмас жаттығу құралы», – деді ол.
Айта кетейік, «Жастар Рухы» жастар қанаты өскелең ұрпақ арасында белсенді азаматтық ұстанымды қалыптастыруға бағытталған іс-шараларды дәстүрлі түрде өткізеді. Мәселен, зияткерлік сұрақ-жауаптар, әлеуметтік желілерде челлендждер, флешмобтар, мерекелік концерттер және ел жастарын бірліктің, Тәуелсіздіктің және Отанға деген сүйіспеншіліктің негізгі идеялары төңірегінде топтастыратын креативті акциялар ұйымдастырады.
