«AMANAT» партиясы жанындағы «Жастар Рухы» Жастар қанаты мен «Жайдарман» қозғалысының серіктестігі 11 жылдан бері жалғасып келеді. Осы уақыт ішінде екі ұйым еліміздің ең талантты жастарының басын қосып, мазмұнды ойындар мен жарқын жобалар ұйымдастырылып жатыр.
Биыл да дәстүр жалғасын тауып, Астанада Жайдарман «Ulttyq Liga»-ның 1/8 финалдық ойындары өтті.
Турнир 31 наурыз және 1 сәуір аралығында 30-дан астам команданың қатысуымен өтіп, еліміздің түкпір-түкпірінен жиналған таланттар көрермендерге өткір әзілдерімен әлеуметтік-саяси тақырыптар қозғалған ерекше ойындар ұсынды.
«AMANAT» партиясы жанындағы «Жастар Рухы» Жастар қанатының төрағасы Ақерке Искандерованың айтуынша басты мақсат – талантты жастардың өз әлеуетін жүзеге асыруына қолдау көрсету.
«Жайдарман тек әзіл алаңы емес, бұл - жас буынның азаматтық көзқарасын қалыптастырып, қоғамдағы маңызды мәселелерді әзіл арқылы жеткізуге мүмкіндік беретін ерекше жоба. Біздің серіктестігіміз 11 жылдан астам уақыт бойы жалғасып келеді және біз алдағы уақытта да жастардың дамуына бағытталған бастамаларды қолдауды жалғастырамыз», - деді Ақерке Искандерова.
«Жайдарман бұл жастардың өзін-өзі дамытуына, ел алдында өз ойын еркін жеткізуіне мүмкіндік беретін платформа. Біз елдің түкпір-түкпіріндегі талантты жастарды қолдауға, оларға жаңа мүмкіндіктер ұсынуға күш саламыз. Биылғы ойындар жоғары деңгейде өтіп жатыр, қатысушылар өзекті мәселелерді көтеріп, қоғамға ой салатын әзілдер ұсынуда. Осындай жобалардың арқасында жастардың өнері мен белсенділігі артып, елімізге жаңа көшбасшылар қалыптасатынына сенемін», - деп атап өтті Жайдарман ойындарының негізін қалаушы Есен Елеукен.
«Жастар Рухы» мен «Жайдарман» арасындағы ұзақ мерзімді серіктестік жастардың шығармашылық потенциалын дамытуда маңызды рөл атқарып келеді. Биылғы Ulttyq Liga 1/8 финалдық ойындары тағы бір дәлел боларлықтай, себебі олар қоғамдағы өзекті мәселелерді өткір әзілмен жеткізуді көздейді. Бұл шара жастардың азаматтық көзқарасын қалыптастыруға, шығармашылық қабілеттерін шыңдауға бағытталған маңызды алаңға айналды.
Ойын нәтижесі бойынша келесі командалар 1/4 финалға жолдама алды: «Татьяна» Маңғыстау облысы, «Көршінің қызы» Алматы қаласы, «Сатпаев құрамасы» Ұлытау облысы, «Мадемуазель» Шымкент қаласы, «Сұрап алмадық» Қарағанды облысы, «Ою» Тараз қаласы, «Байғанин» Ақтөбе облысы, «Әуезов құрамасы» Абай облысы, «Sweet» Ақтөбе облысы, «Бізде осы» Ақтөбе облысы, «Тұмар» Астана қаласы, «Смарт» Абай облысы, «Зертас» Шымкент қаласы, «Тайпақ құрамасы» Батыс Қазақстан облысы, «Нұр Зайсан» Шығыс Қазақстан облысы, «Ембі құрамасы» Ақтөбе облысы, «Құтқарушылар» Атырау облысы.
Ұйымдастырушылардың айтуынша, алдағы уақытта да осы дәстүр жалғасын тауып, жастардың таланттарын таныту үшін жаңа алаңдар мен мүмкіндіктер ұсынылатын болады.
