Былтыр басталған Наурызнама онкүндігі аясында 20 наурыз – Ұлттық спорт күні болып бекітілді. Осы күннің қарсаңында Turkystan.kz сайтының тілшісі Астана қаласы Асық ату федерациясының президенті, асық ату спортынан Астана қаласының аға жаттықтырушысы Рахметов Ескендір Серікұлымен әңгімелескен болатын.
Астана қаласының Асық ату федерациясы 2016 жылы 17 наурызында құрылған. Осы уақыт аралығында федерацияның жеткен жетістігі аз емес.
«Былтыр өткен Дүниежүзілік көшпенділер ойындарында Қазақстан құрамасының сапында Астанадан, біздің федерация баптаған екі ер, екі қыз бала қатысты. Екі қызымыз жеңімпаз атанып, марапат алды. Одан бөлек, Көшпенділер ойындарының аясында Әлем чемпионаты өтті. Астана қаласынан екі спортшы қатысып, жүлдегер атанды. Кеше ғана «Алтын сақа» атты олимпиада өтті. Ол жерде қыздарымыз бірінші орын, ұлдарымыз үшінші орын алды. Біздің командада 4 Азия чемпионы, 5 Әлем кубогінің жеңімпазы бар. Одан бөлек, халықаралық турнирлерде топ жарғаны қаншама! Жалпылама айтсам, Астана қаласынан 25 спорт шеберін, 55 спорт шеберіне үміткер дайындадық. 15 жаттықтырушы бар», – дейді маман.
Федерацияға асық атуды үйрет деп келетін тұрғын көп екен. Олардың арасында 7 жастан 70 жасқа дейінгі адамдар бар. Маман қазіргідей түрлі хоббиді жанына серік ететін заманда жас балалардың асық атуды үйренуге ниет танытатыны көңіл қуантаныны айтады. Бапкердің айтуынша, қазір асық ату спорты қарқынды дамып келеді.
«Бізге 7-10 жастағы балалар көп келеді. Қаладағы бүкіл мектептен келеді деп айтсам, артық айтпаймын. Асық ату сайыстарының арқасында қаладағы көп бала бір-бірімін етене танысып, бүгінде жақын араласып жүр. Мектептерде ұлттық ойындары дәріптейтін түрлі іс-шара өтіп жүр. 14-наурыздан бастап түрлі ойын, түрлі сайыс ұйымдастырылып келеді. Тіпті, біз сол іс-шаралардың бәріне үлгермей жатырмыз. Бұл нені білдіреді? Бұл асық ату ойынының дамығанын білдіреді. Осыдан 7-8 жыл бұрын балаларға «Асық ойнашы» деп жалынатынбыз. Ойнайтын адам таппай, төрелік ететін маман таппай қиналатын едік. Қазір мейрам қарсаңында мемлекеттік мекемелер мен ұлттық компанияларда да асық атудан жарыс ұйымдастырылады. Қазақ күресі, көкпар, асық ату, жалпы, ұлттық ойындардың қай-қайсы болмасын бір-бірінен қалмай, қарқынды келеді. Соның ішінде асық ату брендке айналып келеді», – дейді Ескендір Серікұлы.
