Автомектеп бизнес емес, бұл – жүргізушілерді толыққанды даярлау. Бұл туралы Ішкі істер министрі Ержан Сәденов Орталық коммуникациялар қызметінің подкастында айтты. Сонымен қатар елдің бас полицейі жол қауіпсіздігі жағдайына қатысты түсініктеме берді.
Айта кетейік, Мемлекет басшысының 2024 жылғы 2 қыркүйектегі Қазақстан халқына Жолдауында «Жол-көлік инфрақұрылымын жақсарту және интеллектуалдық жүйені енгізу арқылы жол қауіпсіздігін қамтамасыз етуге болады. Жүргізушілерді даярлау деңгейінің де төмендеп кеткені жасырын емес. Жүргізуші куәлігін арнайы оқымай-ақ алатын жайттар бар. Үкімет, әкімдер, Ішкі істер министрлігі батыл қадам жасауы керек. Депутаттар бұл мәселені назарда ұстауға тиіс» деп атап өткен болатын.
Жол қауіпсіздігін сақтау үшін 25 мыңнан астам бейнебақылау камерасы орнатылған. Жалпы республика бойынша олардың саны 1,5 млн-нан асады.
«Олар көше, жол қауіпсіздігін бақылауға арналған. Енді оны одан әрі де ұлғайтатын боламыз. Цифрландыру жүргізіліп жатыр, ауылдарға да жетті. Сол себептен бұл жұмысты күшейтетін боламыз», – деді Ержан Сәденов.
Спикер автомектептерге жеке тоқталып, оның түлектері аз уақытта жол-көлік оқиғасына ұшыраса, ауыр дене жарақатын алса, ол үшін жауапкершілік қарастырылатынын атап өтті.
«Ол адам автомектеп ашамын, оқытамын дегенде өзінің жауапкершілігін түсінуі керек. Автомектептер – жай ғана бизнес емес, жүргізушіні дайындайтын адам. Автокөлік – аса қауіпті көлік құралы», – деп атап өтті Ержан Сәденов.
Сонымен қатар ІІМ басшысы полиция жұмысының маңызды бағыттарының бірі туризмді дамытуға үлес қосуы екенін атап өтті.
«Бізде туристік полиция бөлімі бар. Негізінен үлкен қалаларда, белгілі бір туристік аймақтарда. Ал енді оны барлық өңірлерде ашамыз. Туристік полиция тек шетелдіктерге ғана арналмаған. Ішкі туризм де бар», – деді Ержан Сәденов.
Оның айтуынша, адамдар туристік полиция қызметкерлеріне мәселелер бойынша жүгінбейді. Сонымен қатар, ІІМ туристерге қатысты ықтимал заңсыз әрекеттерді тоқтату үшін іс-шаралар қабылдайды.
«Жұмысқа қабылдаған кезде тілдерді білуіне қарап, біз үздіктерді алуға тырысамыз. Жоғарыда айтып өткенімдей, полицияда патриоттық сезімі жоғары адамдар жұмыс істеуі керек», – деп түйіндеді ІІМ министрі.
Айта кетейік, ІІМ әуежайларда шетелдіктерге туристік карта береді. Онда олардың қауіпсіздігін қамтамасыз етуге мүмкіндік беретін ақпарат ұсынылған.
