8 наурыз Халықаралық әйелдер күні қарсаңында елордада 5-6 наурыз күндері «AMANAT» партиясының Әйелдер қанаты мен Tomiris жобасы қатысушыларының республикалық кездесуі өтуде, деп хабарлады turkystan.kz.
Іс-шараның алғашқы күніндегі басқосуға AMANAT партиясының Атқарушы хатшысы Дәулет Кәрібек, Әйелдер қанатының төрағасы Шолпан Каринова, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның мүшесі Бибігүл Ағыбаева, Мәжіліс депутаттары, сондай-ақ барлық 20 өңірден Tomiris жобасының қатысушылары жиналды.
Бұл кездесу Tomiris жобасын одан әрі дамытуға, сондай-ақ әйелдердің саяси, экономикалық және қоғамдық өмірдегі рөлін күшейтуге арналған маңызды алаңға айналды.
«AMANAT» партиясының Атқарушы хатшысы Дәулет Кәрібек өз сөзінде жоба аясында әйелдердің саяси алаңдағы белсенділігі артып, бүгінде олардың ел игілігі үшін қызмет етіп жүргенін атап өтті.
«Мемлекет басшысы гендерлік саясаттың маңыздылығына ерекше назар аударып, еліміздегі әйелдердің мүмкіндіктерін кеңейту қажеттігін жиі айтады. Бұл ретте партиямыздың жанынан құрылған Әйелдер қанаты үлкен бастамаларға ұйытқы болуда. Оның аясында маңызды заң жобалары әзірленіп, алғашқы рет елімізде психологиялық қызмет туралы заң жобасы ұсынылды. Сонымен қатар, ел экономикасында «гендерлік бюджеттендіру» ұғымы енгізілді. Мұның барлығы жобаға қатысушы қыз-келіншектердің еңбектеріңіздің жемісі», - деді ол.
Жиын басында сөз алған «AMANAT» партиясының Хатшысы, Әйелдер қанатының төрағасы Шолпан Каринова жобаның маңыздылығына тоқталды.
«Ел Президентінің жүргізіп отырған саясатының негізінде «AMANAT» партиясы халық алдындағы уәделерін орындап келеді. Бүгінгі басқосу – әйелдер көшбасшылығын нығайтуға арналған маңызды алаң. Бүгінде Tomiris жобасының түлектері өңірлерде белсенді жұмыс атқаруда. Біздің мақсатымыз – олардың тәжірибесін кеңейту, жобаларын дамытуға қолдау көрсету», - деді ол.
Кездесу аясында ұйымдастырылған панельдік сессияларда қатысушылар әйелдердің саясаттағы, экономикадағы және қоғамдық өмірдегі рөлін кеңейту мәселелерін талқылады. Панельдің сессия барысында Tomiris жобасының қатысушылары өз тәжірибелерімен бөлісті. Жоба түлегі Алма Сыдықова мұндай кездесулер әйел көшбасшылары үшін жаңа серпін беріп, тәжірибе алмасу мен маңызды шешімдер қабылдауға жол ашатынын айтты.
«Мен Tomiris жобасының үшінші легінің қатысушысымын. Бұл жоба менің өмірімді түбегейлі өзгертті. Бүгінгі кездесу барысында жаңа идеялар мен тәжірибелер алмасуға мүмкіндік алдық. Әсіресе, әйелдердің әлеуметтік мәселелерге ықпал етуі, ұрпақ тәрбиесіндегі рөлі кеңінен талқыланды. Бұл мәселелерді шешу бағытында біз жаңа жобаларды қолға аламыз», - деді ол.
Іс-шараның бағдарламасы барысында сессиялардың модераторлары ретінде Мәжілістегі «AMANAT» партиясы фракциясының мүшелері Жұлдыз Сүлейменова, Екатерина Смышляева және Үнзила Шапақ болды. Сессиялар жұмысына Әйелдер қанатының өңірлік кеңесшілерімен және «Tomiris» партиялық жобасының қатысушыларымен бірге ҚР Парламенті Мәжілісінің депутаттары Айгүл Құспан, Юлия Кучинская, Айна Мысырәлімова, Гүлдара Нұрымова, Вера Ким, Снежанна Имашева қатысты. Олар парламенттегі жұмыс тәжірибелері, әйелдер мен қоғамның өмірін жақсартуға бағытталған бастамалар туралы айтып, елдегі гендерлік теңдікті ілгерілетудің тиімді механизмдерімен бөлісті.
Айта кетейік, бүгінге дейін Tomiris жобасы аясында 100-ден астам әйел «Әйелдердің саяси көшбасшылығы» бағдарламасының оқу курсынан өтті.
