Алматыда көптің алғысына бөленген автобус жүргізушісі марапатталды

Алматыда автобус жүргізушісі Қанат Ахметов қала әкімінің атынан алғыс алды, деп хабарлады turkystan.kz сайты.

Ол арбаға таңылған жолаушыны көтергіш құралдың көмегімен автобусқа кіргізуге көмектесті. Бұл оқиғаны әлеуметтік желіде экобелсенді Евгений Мұхамеджанов жариялаған. Жазбаға тұрғындар көптеген жылы лебіз білдірді.

Әкімнің атынан алғыс хат пен сыйлықты тапсыру барысында «Алматыэлектротранс» автопаркінің басшысы Александр Бейсембиев Қанат Ахметовтің кәсібилігін және бауырмалдығын ерекше атап өтті. 

 Автобус жүргізуші жай ғана өзінің міндетін орындағанын жеткізді. Оның айтуынша, қоғамдық көлік қызметкерлері жолаушыларды тасымалдаумен қатар, олардың қауіпсіздігі мен жайлылығын қамтамасыз етуге де жауапты.

 Қанат Ахметов төрт баланың әкесі, жүргізуші болып жұмыс істеп жүргеніне шамамен бір жыл болған.