АЭС құрылысы бірнеше аралас салаларды дамытуға мүмкіндік ашады
АЭС салуды қолдау жөніндегі республикалық халық штабының мүшелері Солтүстік Қазақстан облысы Мамлют ауданының жұртшылығымен жүздесті. Кездесу барысында атом электр станциясын салудың әлеуметтік-экономикалық артықшылығы мен елдің энергетикалық қауіпсіздігі мәселесі талқыланды.
Ауданның ең ірі кәсіпорындарының бірі «Новомихайловское - 2003» серіктестігі мал және егін шаруашылығымен айналысады. Сондықтан ұжымға атом электр станциясының солтүстікқазақстандықтардың өміріне қалай әсер ететінін білу маңызды. Халық штабының мүшелері жоба тұтастай алғанда елдің, оның ішінде солтүстік өңірлердің тұрақты дамуы үшін маңызды екенін атап өтті.
«Станцияның құрылысы басқа жерде жоспарланғанымен, оның оң әсері бүкіл республикаға тиетіні сөзсіз. Бүгінде оңтүстік өңірлер электр энергиясының тапшылығын сезіп жатыр. Солтүстік аймақтарда мұндай проблема жоқ. Алайда біз біртұтас электр желісіндеміз. Ал қосымша энергияны, яғни артығы болса, біз оны Ресей елі мен Беларуське сатамыз. Жетіспеушілік болған кезде үш есе қымбатқа сатып аламыз. Бұл біздің, оның ішінде Солтүстік Қазақстан облысының экономикасына да әсер етеді. Бүкіл елді электр энергиясымен кепілдендірілген қамтамасыз ету үшін атом электр станциясын салу қажеттілігі туындады», – деп атап өтті халық штабының мүшесі Дмитрий Колода.
Штаб мүшесі атом электр станциясы сенімді және экологиялық таза энергия көзін қамтамасыз ететінін айтты. Бұл өз кезегінде электр бағасының төмендеуіне және өмір сүру деңгейінің жоғарылауына ықпал етеді. Сонымен қатар, атом электр станциясының құрылысы жұмыс орындарын құруға және бірқатар аралас салаларды дамытуға мүмкіндік ашады.
Бұл күні халық штабы ауданның этномәдени бірлестіктерінің өкілдерімен де кездесті. Іс-сапармен жүрген штаб мүшелері қатысушыларды референдумға белсенді қатысуға, бүкіл елге айтарлықтай пайда әкелетін жобаға қолдау білдіруге шақырды.
«Әркімнің дауысы маңызды. Референдум – еліміздегі демократияның белгісі. Сондықтан атом электр станциясын салу туралы түпкілікті шешім осы референдум арқылы қабылданады. Мен Мамлют ауданында ұзақ жылдар бойы жұмыс істедім. Жергілікті тұрғындар осындай тарихи шешімдер қабылдау тұрғысынан өте белсенді екенін жақсы білемін. Сондықтан мен 6 қазанда референдумға бір адамдай қатысып, дұрыс шешім қабылдайтындарыңызға кәміл сенемін», – деді штаб мүшесі Еркебұлан Мәмбетов.
Халық штабы еліміздің энергетикалық болашағын білім беру қызметкерлерімен және ауданның құрметті азаматтарымен де талқылады. Қатысушылар АЭС жобасы шеңберінде әзірленуі мүмкін білім беру бағдарламаларына ерекше назар аударуда. Штаб өкілдері бұл әсіресе Президенттің жуырдағы Жолдауы аясында өзекті екенін атап өтті.
