Бишімбаев ісі: Судья шешім шығару үшін алқабилерге қойылатын сұрақтарды оқыды

Әйелі Салтанат Нүкенованы «асқан қатыгездікпен қинап өлтірді» деп айыпталған экс-министр Қуандық Бишімбаев пен оның туысы Бақытжан Байжановқа қатысты сот процесі жалғасып жатыр.

Сот отырысында судья Айжан Құлбаева шешім шығару үшін алқабилерге қойылатын сұрақтар тізімін оқыды. 

Оның ішінде, Бишімбаевқа қатысты ҚК 110-бабы бойынша қойылған сұрақтар:

• 2022 жылдың 16 желтоқсанынан 2023 жылдың 9 қарашасына дейін, 2022 жылдың наурыз, сәуір, қазанында, сондай-ақ 2023 жылдың жазында Астана және Алматы қалаларында жәбірленуші Нүкеноваға денесінің түрлі бөлігін және басынан ұру арқылы физикалық қысым жасалғаны, ар-намысына тию арқылы моральдық қысым жасалғаны дәлелденді ме?
• Бұл әрекетті сотталушы Бишімбаевтың жасағаны дәлелденді ме?
• Сотталушы Бишімбаев бұл әрекетті жасағанына кінәлі ме?
• Жәбірленуші Нүкенованың сотталушы Бишімбаевпен бірге тұра бастаған уақыттан бастап өз бетінше ақша табуды доғарып, оған материалдық тұрғыда тәуелді болды ма?

Қылмыстық кодекстің 99-бабы бойынша қойылатын сұрақтар реті:

• 2023 жылдың 9 қарашасында шамамен түстен кейін Астанадағы Bau мейрамханасында жәбірленуші Нүкенова бас-ми жарақаты салдарынан қайтыс болғаны дәлелденді ме?
• Бұл жарақат жәбірленуші Нүкеноваға басына бірнеше соққыны саналы түрде жасау арқылы мақсатты түрде өлтіргені дәлелденді ме?
• Бұл әрекетті сотталушы Бишімбаевтың жасағаны дәлелденді ме?
• Сотталушы Бишімбаев бұл әрекетті жасағанына кінәлі ме?
• Сотталушы Бишімбаевтың жәбірленуші Нүкенованы ұрып-соғып, оған су мен ұйқы бермей қорлап, аясусыз физикалық қысым жасау арқылы өлтіргені дәлелденді ме?
• Нүкенова басынан алған жарақат саналы түрде жасалғаны, оның денсаулығына аса ауыр зиян келтіргені, соның салдарынан қайтыс болғаны дәлелденді ме? Сотталушы Бишімбаевтың бұл әрекетті жасағаны дәлелденді ме және сотталушы Бишімбаев бұл әрекетті жасағаны үшін кінәлі ме?

Кейін судья Айжан Құлбаева шешім шығару үшін 10 негізгі алқабимен бірге кеңесу бөлмесіне кетті.