Нүкенованың ағасы марқұмның есімін пайдаланып, алаяқтар ақша жинап жатқанын айтты
Айтбек Амангелді көпшілікті белгісіз адамдарға ақша аударудан сақ болуға шақырды.
Белгісіз біреулер марқұм Салтанат Нүкенованың есімін пайдаланып, желіде ақша жинаған. Бұл жайлы Айтбек Амангелді Instagram-дағы парақшасында ескертті,деп хабаралады turkystan.kz nur.kz-ке сілтеме жасап.
Салтанат Нүкенованың ағасы, алаяқтардың ақша жинау үшін марқұм қарындасының суретін пайдаланып жүргенін айтты. "Осы уақытқа дейін біз ешқандай ақша жинаған емеспіз", - деді Айтбек Амангелді.
Сонымен қатар марқұмның ағасы ішкі істер министрлігін белгілеп, алаяқтарды ұстауды сұрады.
Сондай-ақ Айтбек марқұм қарындасының суретін емге ақша жинау үшін пайдаланып жүргендер барын да айтты.
«Мен емге ақша жинау үшін Салтанаттың суреті мен видеоларын пайдаланғандардан өшіруді талап етемін. Салтанаттың суретін қаралым жинау үшін пайдаланғандары - жиіркенішті. Әсіресе, оның суретін курсын сату үшін пайдаланғандар өте төмен дәрежедегі іс істеді. Адамның қайғысына жанашырлық таныта отырып, өзінің риквизитін жазып қою дұрыс емес», - деді Айтбек Амангелді.
Айтбек Амангелді өз жазбасында көпшілікті белгісіз адамдарға ақша аударудан сақ болуға шақырды.
