Сарбаз Бекбол Мираштың өлімі: сот күдіктінің жазасын қатаңдатты
Сержант Айбек Нұртаев сарбазды өзін-өзі өлтіруге итермелегені үшін 3 жыл 6 айға сотталды.
Әскери соттың қылмыстық істер жөніндегі сот алқасы сарбаз Бекбол Мираштың өз-өзіне қол жұмсап, қаза болғанынан кейін күш қолданып, билігін асыра пайдаланып бопсалады деп айыпталған "Шөлдала" шекара заставасының сержанты Айбек Нұртаевқа қатысты жазаны қатаңдатты, деп хабарлады turkystan.kz Stan.kz сайтына сілтеме жасап.
Тамыз айының соңында Шымкент гарнизонының әскери соты жасақ командирі сержант Айбек Нұртаевты өзін-өзі өлтіруге итермелегені үшін 3 жыл 6 айға соттады. Сот алқасы сарбаздың ісін қарады. Сот мобильді топтың жетекшісі бола тұра, оның қызметтік өкілеттігін жоспарлы түрде және негізсіз асыра пайдаланып, әскери қызметші Бекбол Мираштың ар-намысы мен қадiр-қасиетiн қорлағаны, әскерге шақырылушының өз-өзіне қол жұмсауына әкеп соққанын анықтады.
"Қылмыстық істер жөніндегі сот алқасының үкімімен әскери қызметші Нұртаев қылмыстық кодекстің 194-бабының 2-бөлігінің 1-тармағында (Зорлық-зомбылық қолданып бопсалау) және қылмыстық кодекстің 451-бабының 1-бөлігінде (Билiктi немесе қызметтiк өкiлеттiктердi асыра пайдалану) көзделген қылмыстарды жасағаны үшін кінәлі деп танылып, жеті жылға бас бостандығынан айырылды", –делінген хабарламада.
Үкім заңды күшіне енді.
Еске салсақ, 2022 жылдың 19 тамызында қатардағы жауынгер Бекбол Мираш Тараздағы ҰҚК шекара қызметіне қарасты "Шөлдала" заставасында асылып тұрған жерінен табылған. Күдікті ретінде заставада келісімшарт бойынша сержант Айбек Нұртаев танылып, қамауға алынған болатын.
