Қазақстанның тағы бір ауылы ішімдіктен бас тартты

Қарабұлақ дүкендерінде алкогольді сусындар сатылмайды. Нәтижесінде қылмыс деңгейі біршама төмендеген, деп хабарлады Хабар 24 телеарнасы.

Дина Төлегенова ауылдағы ең ірі дүкеннің иесі. Ол алкогольді сатудан үзілді-кесілді бас тартқан.  Оның айтуынша, бұл шешім табысқа әсер етпеген.

«Үш жыл бұрын ашылғаннан бері арақ пен темекі сатпадық. Күйеуім екеуміз солай шештік. Бұдан біздің бизнесіміз зардап шекпейді, кіріс те азаймайды», - дейді Дина Төлегенова.

Соңғы үш жылда Қарабұлақта бірде-бір қылмыс орын алмаған. Дегенмен учаскелік полиция қызметкері қырағылығын жоғалтпайды: ол күн сайын профилактикалық сөйлесулер мен кездесулер жасайды.

«Адамдар көп қылмыс жасайды, әсіресе тұрмыстық қылмыстарды мас күйінде жасайды. Біздің ауылдың тұрғындары бұрын арақ ішуге бейім емес еді. Ал қазір жалпы шешіммен маскүнемдікке толық тыйым салынды. Қазір құқықбұзушылықтар жоқ, қылмыстар әлдеқайда аз», - дейді учаскелік полиция инспекторы Аманбек Әубәкіров.

Қарабұлақта 500 адам тұрады. Олардың бестен бірі – жастар. Көп адамдар спортқа қызығушылық танытады. Ауылдың өз волейбол командасы бар. Олар облыстық, тіпті республикалық жарыстарға қатысады.

«Жаман әдеттерден аулақ болыңдар» дейді қарттар. Біз олармен толықтай келісеміз. Салауатты өмір салтын ұстанамыз. Спорт - денсаулық кепілі», - дейді ауыл тұрғыны Ақжол Бейсенбай.